બાંગ્લાદેશમાં વધુ એક હિંદુની હત્યા, જસોર જિલ્લાના મણિરામપુરમાં હિન્દુ યુવાન રાણા પ્રતાપ બૈરાગીની જાહેરમાં ગોળી મારી કરી હત્યા

બાંગ્લાદેશના જસોર જિલ્લાના મણિરામપુરમાં હિન્દુ યુવાન રાણા પ્રતાપ બૈરાગીની જાહેરમાં ગોળી મારીને હત્યા કરવામાં આવી. આ ઘટના કોપાલિયા બજાર વિસ્તારમાં બની હતી, જ્યાં અજાણ્યા હુમલાખોરોએ ગોળીબાર કર્યો હતો. પોલીસ ઘટનાસ્થળે પહોંચી હતી અને તપાસ શરૂ કરી હતી. 

બાંગ્લાદેશમાં હિન્દુ સમુદાય પર હિંસાનો બીજો એક કિસ્સો સામે આવ્યો છે. જસોર જિલ્લાના મણિરામપુર ઉપજિલ્લામાં જાહેર સ્થળે એક હિન્દુ યુવાનની ગોળી મારીને હત્યા કરવામાં આવી. મૃતકની ઓળખ 45 વર્ષીય રાણા પ્રતાપ બૈરાગી તરીકે થઈ છે. તે કેશબપુર ઉપ જિલ્લાના અરુઆ ગામના રહેવાસી હતો.આ ઘટના સોમવારે સાંજે લગભગ 5:45 વાગ્યે મણિરામપુરના વોર્ડ નંબર 17 ના કોપાલિયા બજાર વિસ્તારમાં બની હતી. પ્રત્યક્ષદર્શીઓ અને પોલીસ સૂત્રોના જણાવ્યા અનુસાર રાણા પ્રતાપ બજારમાં હતા ત્યારે એક અજાણ્યા હુમલાખોરે અથવા હુમલાખોરોએ તેમના પર અચાનક ગોળીબાર કર્યો. ગોળી વાગવાથી રાણા પ્રતાપનું ઘટનાસ્થળે જ મોત થયું.