કેન્દ્ર સરકારે પ્રધાનમંત્રી ઉજ્જવલા યોજના વિસ્તરણને આપી મંજૂરી, ૨૫ લાખ મહિલાઓને નવા અને મફત LPG કનેક્શન આપવામાં આવશે

કેન્દ્ર સરકારે પ્રધાનમંત્રી ઉજ્જવલા યોજના (PMUY)ના વિસ્તરણને મંજૂરી આપી છે, જેના હેઠળ નાણાકીય વર્ષ ૨૦૨૫-૨૬ દરમિયાન દેશભરમાં ૨૫ લાખ મહિલાઓને નવા અને મફત LPG કનેક્શન આપવામાં આવશે.

આ નિર્ણય મહિલા સશક્તિકરણની દિશામાં એક મોટું પગલું છે. કેન્દ્રીય મંત્રી હરદીપ સિંહ પુરીએ જણાવ્યું કે આ વિસ્તરણથી ઉજ્જવલા યોજનાના લાભાર્થીઓની સંખ્યા વધીને ૧૦.૬૦ કરોડ થશે. સરકાર દરેક કનેક્શન માટે ₹૨,૦૫૦નો ખર્ચ કરશે, જેમાં ગેસ સિલિન્ડર, સ્ટવ અને રેગ્યુલેટર જેવી ચીજો વિનામૂલ્યે મળશે.

નવરાત્રિના શુભ અવસરે, કેન્દ્ર સરકારે દેશની મહિલાઓ માટે એક મોટી જાહેરાત કરી છે. વડાપ્રધાન નરેન્દ્ર મોદીએ આ નિર્ણયને મહિલા સશક્તિકરણ પ્રત્યેની પ્રતિબદ્ધતા ગણાવ્યો છે.

કેન્દ્રીય પેટ્રોલિયમ અને કુદરતી ગેસ મંત્રી હરદીપ સિંહ પુરીએ જણાવ્યું કે આ નિર્ણયથી માતા દુર્ગા સમાન મહિલાઓનું સન્માન થશે. આ ૨૫ લાખ નવા કનેક્શન સાથે, ઉજ્જવલા યોજનાના કુલ લાભાર્થીઓની સંખ્યા વધીને ૧૦.૬૦ કરોડ થશે. સરકાર દરેક કનેક્શન પર ₹૨,૦૫૦નો ખર્ચ કરશે. આ ખર્ચમાં LPG સિલિન્ડર, ગેસ સ્ટવ અને રેગ્યુલેટરનો સમાવેશ થાય છે, જે લાભાર્થીને સંપૂર્ણપણે મફતમાં મળશે.

હાલમાં, કેન્દ્ર સરકાર PMUYના ૧૦.૩૩ કરોડથી વધુ લાભાર્થીઓને ₹૩૦૦ની સબસિડી પણ આપી રહી છે. આ સબસિડીના કારણે ઉજ્જવલા યોજનાના સિલિન્ડર માત્ર ₹૫૫૩માં મળે છે, જે વિશ્વના LPG ઉત્પાદક દેશો કરતાં પણ ઓછો ભાવ છે. આ વિસ્તરણ મહિલાઓના સ્વાસ્થ્ય અને આર્થિક સશક્તિકરણને વધુ મજબૂત બનાવશે.