દિલ્હીમાં વધતા કોવિડ કેસ વચ્ચે પ્રથમ દર્દીનું મોત,મુખ્યમંત્રીએ લોકોને ગભરાવાને બદલે સાવધ રહેવાની કરી અપીલ

દેશભરમાં ફરી એકવાર કોરોના વાયરસના કેસ વધવા લાગ્યા છે. દિલ્હીમાં કોવિડ-19 થી પીડિત 60 વર્ષીય મહિલાનું મોત થયું. અધિકારીઓએ શનિવારે આ માહિતી આપી.

કોવિડ-19 ના વધતા કેસ વચ્ચે રાષ્ટ્રીય રાજધાનીમાં આ પહેલું મૃત્યુ છે. સત્તાવાર આંકડા અનુસાર, દિલ્હીમાં સારવાર લઈ રહેલા કોરોના દર્દીઓની સંખ્યા 294 છે.

આ સંદર્ભમાં, એક અધિકારીએ જણાવ્યું હતું કે, 'લેપ્રોટોમી પછી મહિલા આંતરડાની બીમારીથી પીડાતી હતી. અચાનક તે કોવિડ-19 થી પીડિત હોવાનું જાણવા મળ્યું.'મુખ્યમંત્રી રેખા ગુપ્તાએ ગુરુવારે કહ્યું હતું કે દિલ્હીમાં 19 કોવિડ દર્દીઓ હોસ્પિટલમાં દાખલ છે, પરંતુ ચિંતા કરવાની કોઈ વાત નથી. તેમણે કહ્યું હતું કે દિલ્હી સરકાર સતર્ક છે અને હોસ્પિટલો કોઈપણ પરિસ્થિતિનો સામનો કરવા માટે તૈયાર છે.

મુખ્યમંત્રીએ લોકોને ગભરાવાને બદલે સાવધ રહેવાની અપીલ કરી છે. તેમણે લોકોને ખાતરી આપી છે કે દિલ્હીની આરોગ્ય વ્યવસ્થા સંપૂર્ણપણે તૈયાર છે, જેમાં બેડ, ઓક્સિજન, દવાઓ અને રસીની ઉપલબ્ધતા સુનિશ્ચિત કરવામાં આવી છે.

મુખ્યમંત્રી રેખા ગુપ્તાએ તાજેતરમાં દિલ્હીની LNJP હોસ્પિટલની પણ મુલાકાત લીધી હતી. આ દરમિયાન તેમણે કોરોનાનો સામનો કરવા માટે એક યોજના બનાવી હતી. આ સાથે આરોગ્ય તૈયારીઓની પણ સમીક્ષા કરવામાં આવી હતી.