ગેંગસ્ટર લોરેન્સ બિશ્નોઈનો ભાઈ અનમોલ બિશ્નોઈ અમેરિકામાં કરાઇ અટકાયત

બિશ્નોઈ ગેંગને લઈને એક મોટા સમાચાર સામે આવ્યા છે. જી હાં લોરેન્સ બિશ્નોઈના ભાઈ અનમોલ બિશ્નોઈને અમેરિકામાં ઝડપી લેવામાં આવ્યો છે. ગેંગસ્ટર લોરેન્સ બિશ્નોઈનો ભાઈ અનમોલ બિશ્નોઈ અમેરિકામાં ઝડપાયો છે. સૂત્રોના જણાવ્યા પ્રમાણે અનમોલની કેલિફોર્નિયામાં અટકાયત કરવામાં આવી છે.

અમેરિકન અધિકારીઓએ થોડા સમય પહેલા અનમોલની તેમના દેશમાં હાજરીની પુષ્ટિ કરી હતી. આ પછી મુંબઈ પોલીસે અનમોલ બિશ્નોઈના પ્રત્યાર્પણનો પ્રસ્તાવ મોકલ્યો હતો. આ ઘટના થોડા દિવસો પછી પ્રકાશમાં આવી.અનમોલ બિશ્નોઈને સલમાન ખાનના ઘરની બહાર ફાયરિંગ અને બાબા સિદ્દીકી હત્યા કેસ સહિત કેટલાક હાઈ-પ્રોફાઈલ ગુનાઓમાં આરોપી તરીકે નામ આપવામાં આવ્યું છે.

ઉલ્લેખનિય છે કે NIA એ તાજેતરમાં અનમોલ બિશ્નોઈ વિશે માહિતી આપનારને ₹10 લાખના ઈનામની જાહેરાત કરી હતી. NIAએ 2022માં નોંધાયેલા બે કેસમાં અનમોલ બિશ્નોઈ વિરુદ્ધ ચાર્જશીટ દાખલ કરી છે. ગયા મહિને મુંબઈ પોલીસની ક્રાઈમ બ્રાન્ચે સ્પેશિયલ મકોકા કોર્ટમાં અરજી દાખલ કરી હતી કે તે ભાગેડુ ગુનેગાર અનમોલ બિશ્નોઈના પ્રત્યાર્પણની પ્રક્રિયા શરૂ કરવા માંગે છે.