મુંબઈમાં વરસાદે આક્રમક મિજાજ દર્શાવવાનું જારી રાખતાં આજે સવારે ૮.૩૦ વાગ્યા સુધીના ૨૪ કલાકમાં આશરે છ ઈંચ જેટલો વરસાદ ખાબક્યો હતો. તેના કારણે શહેરના અનેક વિસ્તારોમાં પાણી ભરાયાં હતાં.

શહેરભરમાં ૨૭ વૃક્ષો તૂટી પડયા હતા. શોર્ટ સર્કીટના ૧૮ અને તેમજ દિવાલ પડવાના સાત બનાવ બન્યા હતા. પરંતુ કોઈપણ પ્રકારની જાનહાનિ થઈ નથી. મુંબઈ શહેર પાણી પુરવઠો પૂરો પાડતાં જળાશયોમાં સારો વરસાદ વરસતા એક જ દિવસમાં ૧૪ દિવસનું નવા પાણીની આવક થઈ છે. આજે જળાશયોમાં ૧૩.૧૮ ટકા પાણી જમા થયું છે.

આગામી ૨૪ કલાકમાં મુંબઈમાં સુસવાટા ભેર પવન ફૂંકાશે. ભારેથી અને અતિ ભારે વરસાદના ઝાપટા શહેરના અનેક ઠેકાણે પડશે એવી આગાહી કોલાબા વેધશાળાએ કરી છે.અરબી સમુદ્રમાં ચોમાસુ સક્રીય  બનતાં મૂશળધાર વરસાદ વરસી રહ્યો હોવાનું હવામાન વિભાગના સૂત્રોએ જણાવ્યું હતું. ઉત્તર કોંકણથી કેરળ સુધીમાં હવાનો હળવા દબાણનો પટ્ટો સર્જાયો છે. આ પરિબળોને કારણે શહેરમાં પ્રતિ કલાકે ૧૦ થી ૧૮ કિમીની ઝડપે પવન ફૂંકાય છે. હજી આગામી ત્રણ દિવસ વ્યાપક વરસાદ  વરસશે તેેવી આગાહી કરાઈ છે.

બુધવાર સવારે ૮.૩૦ વાગ્યાથી આજે ગુરૃવાર સવારે ૮.૩૦  વાગ્યા સુધી વીતેલા ૨૪ કલાક દરમિયાન કોલાબા વેધશાળામાં ૧૪૨.૬ મિમિ  અને સાંતાક્રુઝ વેધશાળામાં ૬૦.૫ મિમિ  વરસાદ  નોંધાયો હતો. .

જ્યારે પાલિકાના ઓટોમેટિક વરસાદના માપક યંત્રના આંકડા મુજબ તળમુંબઈમાં ૮૫.૬૩ મિમિ, પૂર્વ ઉપનગરમાં ૬૫.૩૦ મિમિ, પશ્ચિમ ઉપનગરમાં ૫૩.૧૪ મિમિ વરસાદ નોંધાયો હતો.

મુંબઈમાં ખાસ રાતના સમયમાં મૂશળધાર વરસાદ વરસ્યો હોવાથી ટ્રાફિક અને રેલવેની લોકલ સેવા પર ખાસ અસર પડી ન હતી.જો કે શહેરભરમાં ભારે વરસાદના કારણે ૨૭ વૃક્ષો તૂટી પડયા હતા. જેમાં પશ્ચિમ ઉપનગરમાં ૧૬, પૂર્વ ઉપનગરમાં ૭ અને તળ મુંબઈમાં ૪ વૃક્ષનો સમાવેશ થાય છે.

જ્યારે ઘર અને દિવાલ પડવાની ૭ ઘટના બની હતી. આ બનાવમાં કોઈપણ પ્રકારની જાનહાનિ થઈ નથી. તળ મુંબઈમાં ૪, પૂર્વ ઉપનગરમાં ૨ અને પશ્ચિમ ઉપનગરમાં ૧ ઠેકાણે ઘર અન ેદિવાલ પડવાની ઘટના બની હતી.

આ સિવાય શહેરભરમાં ૧૮ ઠેકાણે શોર્ટ સર્કીટના બનાવ બન્યા હતા. જેમાં તળ મુંબઈમાં ૮, પૂર્વ ઉપનગરમાં ૫ અને પશ્ચિમ ઉપનગર ૫નો સમાવેશ થાય છે. 

મુંબઈમાં શહેરને પાણી પુરવઠો પૂરો પાડતાં સાતેય જળાશયોમાં અને તેના પરિસરમાં સારો વરસાદ પડતા ંપાણીની આવક સારી થઈ છે. માત્ર એક જ દિવસમાં ૧૪ દિવસનું પાણી જળાશયમાં જમા થતાં અત્યારે જળાશયમાં ૧,૯૦,૭૭૧ મિલિયન લીટર પાણી જમા થયું છે. એટલે કે તમામ જળાશયોના ૧૪,૪૭,૩૬૩ મિલિયમની ક્ષમતાના ટાર્ગેટ સામે  ૧૩.૧૮ ટકા પાણીનો સંગ્રહ છે. આમ છતાં પાલિકાએ અપર વૈતરણાના રિઝર્વ ક્વોટામાંથી પાણી લેવાનું ચાલુ રાખ્યું છે.

ગઈકાલે જળાશયોમાં ૧૪૧,૫૧૧ મિલિયન લીટર પાણી હતું. આજે વધીને ૧,૯૦,૭૧૧ મિલિયન પાણી જમા થતાં એક જ દિવસમાં ૧૪ દિવસનું પાણી જમા થયું છે. શહેરને દરરોજ ૩૮૫૦ મિલિયન લીટર પાણીનું વિતરણ કરાય છે.

જળાશયોમાં આજે અપરવૈતરણામાં ૩૩ મિમિ, મોડક સાગરમાં ૨૩૫ મિમિ, તાનસામાં ૨૧૮ મિમિ, મિડલ વૈતરણામાં ૧૭૦ મિમિ, ભાતસામાં ૧૪૧ મિમિ, વિહાર ૫૫ મિમિ, તુલસીમાં ૯૬ મિમિ વરસાદ વરસ્યો હતો.