INS Sumitra : ભારતીય નૌકાદળનું 24 કલાકમાં વધુ એક સફળ ઓપરેશન, 19 પાકિસ્તાનીઓને ચાંચિયાઓની ચુંગાલમાંથી બચાવ્યા

સોમાલી ચાંચિયાઓ સામે ભારતીય નૌકાદળની કાર્યવાહી ચાલુ છે. ભારતીય નૌકાદળે 24 કલાકની અંદર બીજી વખત માછીમારીના જહાજ અલ નામીને બચાવી લીધું છે.

માહિતી આપતાં, એક ભારતીય સંરક્ષણ અધિકારીએ જણાવ્યું હતું કે નૌકાદળના યુદ્ધ જહાજ INS સુમિત્રાએ કોચીના દરિયાકાંઠે લગભગ 800 માઇલ દૂર ચાંચિયાઓ દ્વારા હાઇજેક કરાયેલા માછીમારી જહાજ અલ નામીને બચાવી લીધું છે.

ભારતીય નૌસેનાએ એક નિવેદનમાં કહ્યું કે નેવલ શિપ સુમિત્રાએ સોમાલિયાના પૂર્વ કિનારે વધુ એક સફળ એન્ટી-પાયરસી ઓપરેશન હાથ ધર્યું છે. ભારતીય નૌકાદળે માછીમારીના જહાજ અલ નામી અને તેના ક્રૂને 11 સોમાલી ચાંચિયાઓથી બચાવ્યા છે. આ જહાજમાં 19 પાકિસ્તાની નાગરિકો પણ સવાર હતા.

તમને જણાવી દઈએ કે એક દિવસ પહેલા પણ ભારતીય નૌસેનાએ સફળ ઓપરેશન પાર પાડ્યું હતું. ભારતીય નૌકાદળના યુદ્ધ જહાજ INS સુમિત્રાએ સોમાલી ચાંચિયાઓ દ્વારા અપહરણ કરાયેલા માછીમારોને બચાવ્યા હતા. ચાંચિયાઓએ ઈરાની જહાજને હાઈજેક કર્યું હતું, જેમાં લગભગ 17 ક્રૂ મેમ્બર સવાર હતા.