ખામેનેઈના અંતિમ દર્શન અને અંતિમ સંસ્કારનો કાર્યક્રમ ભારે ભીડ અને સુરક્ષા ચિંતાઓને કારણે સ્થગિત કરાયો, નવી તારીખ ટૂંક સમયમાં થશે જાહેર

ઇરાનના સર્વોચ્ચ નેતા અયાતુલ્લાહ અલી ખામેનેઈના અંતિમ દર્શનનો કાર્યક્રમ હાલ માટે સ્થગિત કરવામાં આવ્યો છે અને તેમના અંતિમ સંસ્કારની નવી તારીખ ટૂંક સમયમાં જાહેર કરવામાં આવશે. તેહરાનમાંથી પ્રાપ્ત માહિતી મુજબ ભારે જનસમૂહ એકત્ર થવાની શક્યતા અને સુરક્ષા સંબંધિત ચિંતાઓને ધ્યાનમાં રાખીને આ નિર્ણય લેવામાં આવ્યો છે. ખામેનેઈની છેલ્લી ઈચ્છા મુજબ તેમને મશહદ શહેરમાં સુપુર્દે ખાક કરવામાં આવશે.

ઇરાનની અર્ધસરકારી સમાચાર એજન્સી અનુસાર તાજેતરના હુમલામાં ખામેનેઈનું અવસાન થયું હતું. ત્યારબાદ રાજધાની તેહરાનમાં અંતિમ દર્શન માટે વિશાળ આયોજન કરવામાં આવી રહ્યું હતું. ઇરાની ટેલિવિઝને બુધવારે જણાવ્યું કે શહીદ ઇમામના અંતિમ દર્શન સમારોહને મુલતવી રાખવામાં આવ્યો છે અને નવી તારીખની જાહેરાત પછી કરવામાં આવશે.