હવામાન વિભાગનું એલર્ટ, આજે 11 રાજ્યોમાં ભારે પવન સાથે વરસાદ પડવાની સંભાવના

દેશના અનેક ભાગોમાં જ્યાં ગરમીની શરૂઆત થઈ ગઈ છે, ત્યાં હવે અચાનક બદલાતા હવામાને લોકોની ચિંતા વધારી દીધી છે. ભારતીય હવામાન વિભાગ (IMD) એ આગામી 24 કલાક દરમિયાન 11 રાજ્યોમાં વરસાદ અને જોરદાર પવનનું એલર્ટ જાહેર કર્યું છે. આ દરમિયાન કેટલાક સ્થળોએ 50 કિલોમીટર પ્રતિ કલાકની ઝડપે પવન ફૂંકાઈ શકે છે. પાકને નુકસાન થઈ શકે તેમ હોવાથી ખેડૂતોને ખાસ સાવચેતી રાખવાની સલાહ આપવામાં આવી છે.

IMD મુજબ 23 ફેબ્રુઆરીથી હિમાચલ પ્રદેશ, ઉત્તરાખંડ, પૂર્વી મધ્ય પ્રદેશ, મેઘાલય, આસામ, અરુણાચલ પ્રદેશ, તેલંગાણા, પશ્ચિમ બંગાળ, ઓડિશા, છત્તીસગઢ અને અંદામાન-નિકોબાર ટાપુઓમાં વરસાદની શક્યતા છે. અનેક જગ્યાએ ગાજવીજ અને વીજળી પડવાની પણ આશંકા વ્યક્ત કરવામાં આવી છે.

• હિમાચલ અને ઉત્તરાખંડ: 23 ફેબ્રુઆરીએ હિમાચલ પ્રદેશમાં અને 23-24 ફેબ્રુઆરી દરમિયાન ઉત્તરાખંડમાં છૂટોછવાયો વરસાદ અને ઊંચાઈવાળા વિસ્તારોમાં હિમવર્ષા થઈ શકે છે.

• મધ્ય ભારત: પૂર્વી મધ્ય પ્રદેશ, વિદર્ભ અને છત્તીસગઢમાં 23 ફેબ્રુઆરીએ વરસાદની સંભાવના છે.

  • પૂર્વોત્તર અને દક્ષિણ ભારત: આસામ, મેઘાલય, પશ્ચિમ બંગાળના મેદાની વિસ્તારો અને તેલંગાણામાં 23 અને 24 ફેબ્રુઆરીએ ગાજવીજ સાથે વરસાદ પડી શકે છે.

  • અંદામાન-નિકોબાર: અહીં 23 થી 26 ફેબ્રુઆરી વચ્ચે ગાજવીજ સાથે વરસાદનું અનુમાન છે.

  • ગુજરાતના કેટલાક ભાગોમાં હળવો વરસાદ સંભવ છે, પરંતુ અમદાવાદમાં હવામાન ચોખ્ખું રહેશે. અમદાવાદમાં મહત્તમ તાપમાન 33 ડિગ્રી અને લઘુત્તમ 20 ડિગ્રી સેલ્સિયસ રહી શકે છે.