પાકિસ્તાન આતંકવાદીઓને ભારતને સોંપવા તૈયાર, બિલાવલ ભુટ્ટોએ આપ્યું મોટું નિવેદન

પાકિસ્તાનના ભૂતપૂર્વ વિદેશ પ્રધાન અને પાકિસ્તાન પીપલ્સ પાર્ટી (પીપીપી) ના પ્રમુખ બિલાવલ ભુટ્ટો ઝરદારીએ મોટું નિવેદન આપ્યું છે.

કે જો ભારત આ પ્રક્રિયામાં ગંભીરતાથી સહયોગ કરવા તૈયાર છે,તો પાકિસ્તાનને તપાસ હેઠળના વ્યક્તિઓને ભારતને સોંપવામાં કોઈ વાંધો નહીં હોય. તેમણે શુક્રવારે અલ જઝીરાને આપેલા ઇન્ટરવ્યુમાં આ નિવેદન આપ્યું હતું.

'ડોન'અખબાર અનુસાર,જ્યારે તેમને લશ્કર-એ-તૈયબાના વડા હાફિઝ સઈદ અને જૈશ-એ-મોહમ્મદના વડા મસૂદ અઝહર જેવા આતંકવાદીઓને ભારતને સોંપવાની શક્યતા વિશે પૂછવામાં આવ્યું ત્યારે બિલાવલે કહ્યું કે જો આ પ્રક્રિયા ભારત અને પાકિસ્તાન વચ્ચે વ્યાપક વાટાઘાટોનો ભાગ બને છે,તો પાકિસ્તાન તેનાથી પાછળ નહીં હટે.

બિલાવલ ભુટ્ટો એ કહ્યું, "આતંકવાદ એક એવો મુદ્દો છે જેના પર ભારત અને પાકિસ્તાને સાથે બેસીને વાત કરવી જોઈએ. જો ભારત આ પ્રક્રિયામાં સહયોગ કરે છે,તો પાકિસ્તાન કોઈપણ'તપાસ હેઠળ ના વ્યક્તિ'ને સોંપવામાં કોઈ વાંધો નહીં ઉઠાવે." બિલાવલે એ પણ સ્પષ્ટતા કરી કે સઈદ અને અઝહર વિરુદ્ધ પાકિસ્તાનમાં નોંધાયેલા કેસ આતંકવાદી ભંડોળ સંબંધિત છે,જેના પર ટ્રાયલ પણ ચાલી રહી છે. તેમણે એમ પણ કહ્યું કે ભારતે મૂળભૂત કાનૂની પ્રક્રિયાઓ પૂર્ણ કરી નથી,જેના વિના આ આતંકવાદીઓને સરહદ પારની પ્રવૃત્તિઓ માટે દોષિત ઠેરવવા મુશ્કેલ છે.

તેમણે કહ્યું, "ભારતે હજુ સુધી પુરાવા,સાક્ષીઓ અને કાનૂની સહાય પૂરી પાડી નથી. જ્યાં સુધી ભારત આવું નહીં કરે,ત્યાં સુધી ટ્રાયલ અને સજા મુશ્કેલ રહેશે." બિલાવલે એમ પણ કહ્યું કે પાકિસ્તાને હાફિઝ સઇદને સજા આપી દીધી છે અને તે હાલમાં જેલમાં છે. તે જ સમયે,પાકિસ્તાન માને છે કે મસૂદ અઝહર હાલમાં અફઘાનિસ્તાનમાં છુપાયેલો છે. તેમણે એમ પણ ટિપ્પણી કરી કે આતંકવાદીઓને પકડવા માટે ભારતની એકપક્ષીય કાર્યવાહી એક "નવી અસામાન્યતા" બની ગઈ છે જે ન તો ભારત કે ન તો પાકિસ્તાનના હિતમાં છે.

બિલાવલનું નિવેદન એવા સમયે આવ્યું છે જ્યારે બંને દેશો વચ્ચેના સંબંધો લાંબા સમયથી તણાવપૂર્ણ છે અને ભારત સતત 26/11 મુંબઈ હુમલાના મુખ્ય કાવતરાખોરો સામે પાકિસ્તાન પાસેથી કડક કાર્યવાહી અને પ્રત્યાર્પણની માંગ કરી રહ્યું છે.