રાષ્ટ્રપતિ ડોનાલ્ડ ટ્રમ્પે બિઝનેસ લીડર્સની હાજરીમાં  "ટ્રમ્પ ગોલ્ડ કાર્ડ" વિઝા પ્રોગ્રામનો સત્તાવાર રીતે કર્યો પ્રારંભ

અમેરિકાના રાષ્ટ્રપતિ ડોનાલ્ડ ટ્રમ્પે બુધવારે (અમેરિકાના સમય અનુસાર) વ્હાઇટ હાઉસ ખાતે બિઝનેસ લીડર્સની હાજરીમાં  "ટ્રમ્પ ગોલ્ડ કાર્ડ" વિઝા પ્રોગ્રામનો સત્તાવાર રીતે પ્રારંભ કર્યો હતો.

કાર્ડના લોન્ચની જાહેરાત કરતા ટ્રમ્પે કહ્યું હતું કે તે "કંઈક અંશે ગ્રીન કાર્ડ જેવું છે, પરંતુ ગ્રીન કાર્ડ કરતાં તેના ઘણા નોંધપાત્ર ફાયદા છે." 

આ કાર્યક્રમનો ઉદ્દેશ્ય રોકાણકારોને આકર્ષવાનો છે

ટ્રમ્પના મતે, આ કાર્યક્રમનો ઉદ્દેશ્ય રોકાણકારો અને ઉદ્યોગસાહસિકોને આકર્ષવાનો, અમેરિકન ઉદ્યોગ માટે અબજો ડોલરની આવક ઉત્પન્ન કરવાનો અને અમેરિકન વ્યવસાયો માટે પ્રતિભા જાળવી રાખવાનો છે, જે ઇમિગ્રેશન પ્રતિબંધોથી વિપરીત છે.

"ગોલ્ડ કાર્ડ" વેબસાઇટ શરૂ થઈ ગઈ છે

"ગોલ્ડ કાર્ડ" વેબસાઇટ શરૂ થઈ ગઈ છે અને વ્હાઇટ હાઉસ હવે નાગરિકતા પ્રાપ્ત કરવા માટે આ નવી પદ્ધતિ માટે ઓનલાઈન અરજીઓ સ્વીકારી રહ્યું છે. "ગોલ્ડ કાર્ડ" વિદેશી નાગરિકોને યુએસ ટ્રેઝરીમાં 1 મિલિયન ડોલરનું દાન આપીને કાયમી નિવાસી દરજ્જો મેળવવાની મંજૂરી આપે છે.

બધા પૈસા અમેરિકન સરકાર પાસે જશેઃ ટ્રમ્પ 

અમેરિકાના રાષ્ટ્રપતિ ડોનાલ્ડ ટ્રમ્પે કહ્યું હતું કે, "મારા અને મારા દેશ માટે ખૂબ જ આનંદની વાત છે કે અમે હમણાં જ ટ્રમ્પ ગોલ્ડ કાર્ડ શરૂ કર્યું છે. વેબસાઇટ લગભગ 30 મિનિટમાં ખુલશે, અને બધા પૈસા યુએસ સરકારને જશે... તે કંઈક અંશે ગ્રીન કાર્ડ જેવું છે, પરંતુ તેનાથી ઘણું વધારે ફાયદાકારક છે."