વડા પ્રધાન નરેન્દ્ર મોદીએ સ્વાતંત્ર્ય સેનાની શ્યામજી કૃષ્ણ વર્માને આપી શ્રદ્ધાંજલિ

વડા પ્રધાન નરેન્દ્ર મોદીએ મંગળવારે સ્વાતંત્ર્ય સેનાની શ્યામજી કૃષ્ણ વર્માને તેમની જન્મજયંતિ પર શ્રદ્ધાંજલિ આપી હતી. આ પ્રસંગે પીએમ મોદીએ ટ્વીટ કરીને કહ્યું કે, 'બહાદુર શ્યામજી કૃષ્ણ વર્માને તેમની જન્મજયંતિ પર શ્રદ્ધાંજલિ. મા ભારતીના આ નિર્ભય પુત્રે ભારતને આઝાદ કરવા અને આપણા લોકોમાં ગૌરવની ભાવનાને આગળ વધારવા માટે પોતાનું જીવન સમર્પિત કર્યું.'

આ સાથે પીએમ મોદીએ પોતાના ટ્વિટર એકાઉન્ટ પર યુટ્યુબ લિંક પણ શેર કરી છે. આ લિંક પર પીએમ મોદી શ્યામજીના જીવન સાથે જોડાયેલા મુદ્દા પર બોલી રહ્યા છે.

શ્યામજી કૃષ્ણ વર્માએ ભારતીય રાષ્ટ્રવાદ અને સ્વતંત્રતાના ઉદ્દેશ્યને પ્રોત્સાહન આપવા માટે લંડનમાં ઈન્ડિયન હોમ રૂલ સોસાયટી, ઈન્ડિયા હાઉસ અને ધ ઈન્ડિયન સોશિયોલોજિસ્ટની સ્થાપના કરી હતી. તેમનો જન્મ 4 ઓક્ટોબર, 1857ના રોજ માંડવી, ગુજરાત ખાતે થયો હતો. શ્યામજીનું અવસાન 30 માર્ચ 1930ના રોજ જીનીવા, સ્વિટ્ઝરલેન્ડમાં થયું હતું.

આંતરરાષ્ટ્રીય કાયદાઓને કારણે તેમનો મૃતદેહ ભારત લાવી શકાયો ન હતો અને ત્યાં તેમના અંતિમ સંસ્કાર કરવામાં આવ્યા હતા. તેમના અગ્નિસંસ્કાર પછી, તેમની રાખને જીનીવાના સેન્ટ જ્યોર્જ કબ્રસ્તાનમાં રાખવામાં આવી હતી. ગુજરાતના મુખ્યમંત્રી બન્યા બાદ નરેન્દ્ર મોદી 2003માં જીનીવા ગયા હતા અને વર્માની અસ્થિઓ ભારત લાવ્યા હતા.