ઉત્તર ભારતના અનેક રાજ્યોમાં ભારે ઠંડી અને ઘુમ્મસનું પ્રમાણ વઘ્યું, ઉત્તર પ્રદેશ, બિહાર અને દિલ્હી-NCR વિસ્તારમાં શીત લહેર જોવા મળી

ઉત્તર ભારતના અનેક રાજ્યોમાં આ દિવસોમાં ભારે ઠંડી અને ઘુમ્મસનું પ્રમાણ વધી ગયું છે. ઉત્તર પ્રદેશ, બિહાર અને દિલ્હી-NCR વિસ્તારમાં શીત લહેરની અસર સ્પષ્ટ રીતે જોવા મળી રહી છે. સવાર અને રાત્રિના સમયે ઘનઘોર ધુમ્મસ છવાઈ રહેતા લોકોને રોજિંદા જીવનમાં મુશ્કેલી પડી રહી છે. 

દિલ્હી અને આસપાસના વિસ્તારોમાં છેલ્લા કેટલાક દિવસોથી તીવ્ર ઠંડી અનુભવાઈ રહી છે. હવામાન વિભાગના જણાવ્યા અનુસાર 23 ડિસેમ્બરથી હવામાનમાં થોડો ફેરફાર આવી શકે છે. દિવસ દરમિયાન આકાશ થોડું સ્વચ્છ રહેશે અને હળવો તડકો પણ જોવા મળી શકે છે. સાથે જ 10થી 25 કિમી પ્રતિ કલાકની ઝડપે પવન ફૂંકાવાની શક્યતા છે. આગામી દિવસોમાં તાપમાનમાં મોટો ફેરફાર નહીં થાય પરંતુ 27 અને 28 ડિસેમ્બરે ઠંડી વધુ વધવાની સંભાવના છે. આ દરમિયાન દિવસનું મહત્તમ તાપમાન આશરે 19 ડિગ્રી અને રાત્રિનું લઘુત્તમ તાપમાન 6 ડિગ્રી સુધી પહોંચી શકે છે.

ઉત્તર પ્રદેશના અનેક જિલ્લાઓમાં ભારે ઠંડી અને ઘનઘોર ધુમ્મસને કારણે લોકો પરેશાન છે. પ્રયાગરાજ, લખનૌ, કાનપુર, વારાણસી સહિત ઘણા વિસ્તારોમાં ઠંડીનો દિવસ રહેવાની શક્યતા છે. ધુમ્મસ એટલું ઘન હોઈ શકે છે કે દૃશ્યતા ઘટીને માત્ર 50 મીટર સુધી રહી શકે છે. અયોધ્યા, બાંદા, કુશીનગર, આઝમગઢ, કન્નૌજ અને બહરાઈચ જેવા વિસ્તારોમાં વાહન ચાલકોને ખાસ સાવચેતી રાખવાની સલાહ આપવામાં આવી છે. લખનૌમાં આજે દિવસનું તાપમાન લગભગ 23 ડિગ્રી અને રાત્રિનું તાપમાન 12 ડિગ્રી આસપાસ રહેવાની શક્યતા છે.