ક્રિકેટ જગતમાંથી એક ચોંકાવનારા સમાચાર, ઓલરાઉન્ડર ડગ બ્રેસવેલે અચાનક આંતરરાષ્ટ્રીય ક્રિકેટના તમામ ફોર્મેટમાંથી સંન્યાસ કરી જાહેરાત

ભારત અને ન્યુઝીલેન્ડ વચ્ચે રમાનારી રોમાંચક વનડે સિરીઝ (ODI Series) શરૂ થાય તે પહેલા જ ક્રિકેટ જગતમાંથી એક ચોંકાવનારા સમાચાર આવ્યા છે.

ન્યુઝીલેન્ડના અનુભવી ઓલરાઉન્ડર ડગ બ્રેસવેલે (Doug Bracewell) અચાનક આંતરરાષ્ટ્રીય ક્રિકેટના તમામ ફોર્મેટમાંથી સંન્યાસ જાહેર કરી દીધો છે. ઈજાના કારણે પરેશાન આ ખેલાડીના નિર્ણયે ચાહકોને આશ્ચર્યમાં મૂકી દીધા છે.

ડગ બ્રેસવેલ છેલ્લા કેટલાક સમયથી પાંસળીમાં થયેલી ઈજા (Rib Injury) થી પીડાઈ રહ્યો હતો. સતત સારવાર છતાં ફિટનેસ સમસ્યાઓ યથાવત રહેતા, આખરે તેણે ક્રિકેટના મેદાનને અલવિદા કહેવાનો કઠોર નિર્ણય લીધો છે. ન્યૂઝીલેન્ડ ક્રિકેટ બોર્ડે (New Zealand Cricket) પણ સોશિયલ મીડિયા પ્લેટફોર્મ 'X' પર એક પોસ્ટ શેર કરીને બ્રેસવેલની નિવૃત્તિ (Retirement) ની સત્તાવાર પુષ્ટિ કરી છે. બોર્ડે તેની સેવાઓને બિરદાવી હતી.

બ્રેસવેલની કારકિર્દી પર નજર કરીએ તો, તેણે ન્યુઝીલેન્ડ ટીમ (New Zealand Team) નું પ્રતિનિધિત્વ કરતા કુલ 69 આંતરરાષ્ટ્રીય મેચો રમી છે. જેમાં 28 ટેસ્ટ, 21 વનડે અને 20 T20I મેચોનો સમાવેશ થાય છે. આ દરમિયાન તેણે કુલ 120 વિકેટ ઝડપી છે અને બેટિંગમાં હાથ અજમાવતા 915 રન પણ બનાવ્યા છે.

તેની કારકિર્દીની સૌથી યાદગાર ક્ષણ ઓસ્ટ્રેલિયા સામેની હોબાર્ટ ટેસ્ટ (Hobart Test) હતી. જેમાં તેણે બીજી ઈનિંગમાં માત્ર 40 રન આપીને કાંગારુઓની 6 વિકેટ ખેરવી નાખી હતી. તેના આ શાનદાર સ્પેલને કારણે ન્યુઝીલેન્ડને 7 રનથી રોમાંચક ઐતિહાસિક વિજય મળ્યો હતો. તેણે પોતાની અંતિમ આંતરરાષ્ટ્રીય મેચ શ્રીલંકા સામે રમી હતી.