હવામાન વિભાગે ઉત્તર ભારતના ઘણા રાજ્યોમાં આગામી થોડા દિવસો માટે હીટવેવ અંગે ચેતવણી જારી કરી

ભારતીય હવામાન વિભાગ (IMD) એ રાજધાની દિલ્હી સહિત ઉત્તર ભારતના ઘણા રાજ્યોમાં આગામી થોડા દિવસો માટે હીટવેવ  અંગે ચેતવણી જારી કરી છે.

 ખાસ કરીને 7 થી 9 એપ્રિલ દરમિયાન દિલ્હીમાં આકરી ગરમી પડવાની સંભાવના છે. હવામાન વિભાગે દિલ્હી માટે 'યલો એલર્ટ' જાહેર કર્યું છે અને મહત્તમ તાપમાન 40 થી 42 ડિગ્રી સેલ્સિયસ સુધી પહોંચી શકે છે.

હાલમાં દિલ્હીમાં તાપમાન સામાન્ય કરતા 3 ડિગ્રી સેલ્સિયસ વધુ નોંધાઈ રહ્યું છે. મહત્તમ તાપમાન 38 થી 40 ડિગ્રી સેલ્સિયસ વચ્ચે છે. હવામાન વિભાગનું કહેવું છે કે 7 અને 8 એપ્રિલે તાપમાનનો પારો 42 ડિગ્રી સુધી જઈ શકે છે, જેના કારણે રાજધાનીમાં હીટવેવ જેવી સ્થિતિ સર્જાઈ શકે છે. દિલ્હીમાં હાલમાં લઘુત્તમ તાપમાન 17 થી 22 ડિગ્રી સેલ્સિયસ વચ્ચે રહે છે, જે સામાન્યની નજીક છે, પરંતુ મહત્તમ તાપમાન 1 થી 3 ડિગ્રી વધારે છે. છેલ્લા 24 કલાકમાં પશ્ચિમ-ઉત્તર-પશ્ચિમ દિશામાંથી 18 કિલોમીટર પ્રતિ કલાકની ઝડપે પવન ફૂંકાયો હતો.