દિલ્હી, ઉત્તર પ્રદેશ, હરિયાણા, પંજાબ અને રાજસ્થાન સહિત ઉત્તર પશ્ચિમ મેદાનોમાં તાપમાનનો પારો વધી રહ્યો છે. હવામાન વિભાગે પાંચ દિવસ સુધી ભારે ગરમી અને તીવ્ર ગરમીનું રેડ એલર્ટ જાહેર કર્યું છે. આ પાંચ રાજ્યોમાં સોમવારે સરેરાશ મહત્તમ તાપમાન 45 ડિગ્રીને પાર કરી ગયું હતું.
હવામાન વિભાગના જણાવ્યા અનુસાર આગામી પાંચ દિવસ સુધી તીવ્ર ગરમીના કારણે દિવસ સવારથી જ બળવા લાગશે, જનજીવન પ્રભાવિત થશે. મધ્યપ્રદેશ, ઓડિશા અને ગુજરાતમાં પણ પાંચ દિવસ સુધી હીટ વેવની શક્યતા છે. તાપમાનનો પારો બેથી ત્રણ ડિગ્રી વધશે. મહત્તમ તાપમાન 47 ડિગ્રી સુધી પહોંચવાની સંભાવના છે. જોકે સોમવારે હિમાચલ પ્રદેશના કેટલાક ભાગોમાં વરસાદ પડ્યો હતો, પરંતુ હીટ વેવ એલર્ટને ધ્યાનમાં રાખીને શાળાના સમયમાં ફેરફાર કરવામાં આવ્યો હતો.
દિલ્હીમાં સોમવારે સતત બીજા દિવસે પારો 47 ડિગ્રીને પાર કરી ગયો હતો. સોમવારે દિલ્હીના નજફગઢમાં મહત્તમ તાપમાન 47.4 ડિગ્રી નોંધાયું હતું. જ્યારે મુંગેશપુરમાં મહત્તમ તાપમાન 47.1 ડિગ્રી નોંધાયું હતું. પીતમપુરામાં 46.6 ડિગ્રી, પુસામાં 46.1 ડિગ્રી, આયા નગરમાં 45.7 ડિગ્રી અને પાલમમાં 45.2 ડિગ્રી તાપમાન નોંધાયું હતું. દિલ્હી સરકારે જે શાળાઓમાં ઉનાળુ વેકેશન નથી તેમને તાત્કાલિક અસરથી આવું કરવાનો નિર્દેશ આપ્યો છે.
22મી મેની આસપાસ દક્ષિણ પશ્ચિમ બંગાળની ખાડીમાં નીચા દબાણનું ક્ષેત્ર બને તેવી શક્યતા છે. આ ડિપ્રેશન શરૂઆતમાં ઉત્તર પૂર્વ તરફ આગળ વધે અને પછી 24 મેની સવાર સુધીમાં બંગાળની ખાડીના મધ્ય ભાગોમાં નબળું પડવાની શક્યતા છે. કોલકાતા અને આસપાસના વિસ્તારોમાં સોમવારે દિવસભર વરસાદ પડ્યો હતો.