હવામાન વિભાગે દિલ્હી-એનસીઆર અને અન્ય ઉત્તર ભારતીય રાજ્યોમાં વરસાદ અને જોરદાર વાવાઝોડાની ચેતવણી કરી જારી

દેશના ઘણા રાજ્યોમાં ચોમાસાએ દસ્તક આપી દીધી છે. ગુરુવારે સાંજે દિલ્હી-એનસીઆરમાં ધૂળનું તોફાન આવ્યું હતું. થોડા કલાકોમાં ભારે વરસાદની ચેતવણી પણ જારી કરવામાં આવી હતી.

હવામાન વિભાગે દિલ્હી-એનસીઆર અને અન્ય ઉત્તર ભારતીય રાજ્યોમાં વરસાદ અને જોરદાર વાવાઝોડાની ચેતવણી જારી કરી છે.

આવતા ત્રણ દિવસ સુધી વરસાદની આગાહી કરવામાં આવી છે. હવામાન વિભાગે ગુરુવાર માટે યલો અને શુક્રવાર માટે ઓરેન્જ એલર્ટ  જારી કર્યું છે. IMD વૈજ્ઞાનિક અખિલ શ્રીવાસ્તવે જણાવ્યું હતું કે, "દેશના ઉત્તર-પશ્ચિમ ક્ષેત્ર - પંજાબ અને હરિયાણામાં વાવાઝોડા અને ભારે પવન ફૂંકાય તેવી શક્યતા છે. આ સમય દરમિયાન આ રાજ્યોમાં ગાજવીજ સાથે ભારે વરસાદ વરસી શકે છે. 

અતિ ભારે વરસાદની સંભાવના

ઓડિશા કિનારાથી ઉત્તર પશ્ચિમ બંગાળની ખાડી પર એક નીચા દબાણનો વિસ્તાર છે. આગામી 24 કલાક દરમિયાન તે ધીમે ધીમે ઉત્તર તરફ આગળ વધવાની અને ઉત્તર બંગાળની ખાડી પર ડિપ્રેશનમાં પરિણમવાની સંભાવના છે. 30 મે સુધી પૂર્વોત્તર રાજ્યો અને ઉપ-હિમાલયી પશ્ચિમ બંગાળ અને સિક્કિમમાં ભારેથી અતિ ભારે વરસાદની સંભાવના છે. આગામી 3-4 દિવસ દરમિયાન પશ્ચિમ કિનારા (કેરળ, કર્ણાટક, દરિયાકાંઠાના મહારાષ્ટ્ર અને ગોવા) પર ભારેથી અતિ ભારે વરસાદની સંભાવના છે. આજથી ઉત્તર પશ્ચિમ ભારતમાં વાવાઝોડા અને ભારે પવન સાથે વરસાદનો નવો ગાળા શરૂ થઈ શકે છે.