હવામાન વિભાગે ઉત્તર ભારતના ઘણા રાજ્યોમાં આગામી ચાર દિવસ સુધી હીટવેવની કરી આગાહી

એપ્રિલના બીજા પખવાડિયાની શરૂઆત સાથે જ દેશના મોટાભાગના વિસ્તારોમાં ગરમીએ પોતાનો કહેર વર્તાવવાનું શરૂ કર્યું છે. હવામાન વિભાગે બંગાળ, બિહાર અને આંધ્રપ્રદેશમાં આકરી ગરમીને લઈને ઓરેન્જ એલર્ટ જાહેર કર્યું છે. આ સાથે જ ઝારખંડ, ઓડિશા, ઉત્તર પ્રદેશ અને સિક્કિમમાં હીટવેવની આગાહી કરવામાં આવી છે. સોમવારે (17 એપ્રિલ) પંજાબ અને હરિયાણામાં હીટવેવની સ્થિતિ પ્રવર્તી રહી હતી, જે મંગળવારે પણ ચાલુ રહી શકે છે. દરમિયાન, એક તાજી વેસ્ટર્ન ડિસ્ટર્બન્સ સક્રિય છે, જેના કારણે પશ્ચિમ હિમાલય અને આસપાસના મેદાનોમાં વરસાદ પડશે.

હવામાન વિભાગે કહ્યું કે પશ્ચિમ હિમાલય ક્ષેત્રમાં સક્રિય પશ્ચિમી વિક્ષેપ મંગળવારથી ઉત્તર પશ્ચિમ ભારતના મેદાની વિસ્તારોમાં ગરમીથી રાહત આપશે. પંજાબ, હરિયાણા, દિલ્હી અને રાજસ્થાનમાં 18-20 એપ્રિલ વચ્ચે છૂટાછવાયા વરસાદની સંભાવના છે.

આગામી બે દિવસ દરમિયાન જમ્મુ-કાશ્મીર, લદ્દાખ, હિમાચલ પ્રદેશ અને ઉત્તરાખંડના હિમાલય વિસ્તારમાં ભારે વરસાદની સંભાવના છે. હિમાચલ, ઉત્તરાખંડ અને પંજાબમાં કરા પડી શકે છે.