આગામી 2 થી 5 દિવસમાં ઘણા રાજ્યોમાં ભારેથી અતિ ભારે વરસાદની હવામાન વિભાગ દ્વારા કરાઇ આગાહી

કેરળમાં એક અઠવાડિયા વહેલા પહોંચ્યા પછી દક્ષિણ પશ્ચિમ ચોમાસુ ફરી ઝડપથી આગળ વધવા લાગ્યું છે. બુધવારે ઉત્તર પ્રદેશ અને રાજસ્થાનમાં ચોમાસુ પહોંચ્યું હતું.

ચોમાસાની અસરને કારણે પૂર્વોત્તર, મધ્ય, પૂર્વ, પશ્ચિમ અને દક્ષિણ ભારત સહિત 20 થી વધુ રાજ્યોમાં ભારે વરસાદ પડી રહ્યો છે. આંધ્રપ્રદેશ સહિત કેટલાક દરિયાકાંઠાના રાજ્યોમાં પણ તેજ પવન ફૂંકાઈ રહ્યો છે. આગામી 2 થી 5 દિવસમાં ઘણા રાજ્યોમાં ભારેથી અતિ ભારે વરસાદની આગાહી છે. ગુજરાત અને બિહારમાં વરસાદ સંબંધિત ઘટનાઓમાં 16 લોકોના મોત થયા છે.

હવામાન વિભાગના જણાવ્યા અનુસાર બલિયા, મઉ, ગાઝીપુર અને સોનભદ્ર સહિત યુપીના ઘણા ભાગોમાં ચોમાસુ પહોંચી ગયું છે. જોકે તે પાંચ દિવસ મોડા પહોંચ્યું. ચોમાસુ નિર્ધારિત સમય કરતાં એક અઠવાડિયા પહેલા રાજસ્થાન પહોંચ્યું. બંને રાજ્યોમાં ભારે વરસાદ પડી રહ્યો છે જે બે-ત્રણ દિવસ સુધી ચાલુ રહી શકે છે. ઉત્તર અરબી સમુદ્ર, ગુજરાત, મધ્યપ્રદેશ, છત્તીસગઢ, ઝારખંડ અને બિહારના વિવિધ વિસ્તારોમાં પણ ચોમાસુ આગળ વધ્યું છે.