ઉત્તરપ્રદેશના મુખ્યમંત્રી યોગી આદિત્યનાથે શિક્ષક દિવસ નિમિત્તે રાજ્યના શિક્ષકો માટે કરી એક મોટી જાહેરાત

ઉત્તરપ્રદેશના મુખ્યમંત્રી યોગી આદિત્યનાથે શિક્ષક દિવસ નિમિત્તે રાજ્યના શિક્ષકો માટે એક મોટી જાહેરાત કરી છે.

મુખ્યમંત્રી યોગી આદિત્યનાથે મોટી જાહેરાત કરતા કહ્યું કે હવે રાજ્યના તમામ શિક્ષકોને કેશલેસ સારવારની સુવિધાનો લાભ મળશે. પ્રાથમિક, ઉચ્ચ પ્રાથમિક, ભંડોળ પ્રાપ્ત શાળાઓના તમામ શિક્ષકોને આ સુવિધા મળશે. શિક્ષા મિત્ર, પ્રશિક્ષકો અને રસોઈયાઓને પણ કેશલેસ સાથે જોડવામાં આવશે.

યોગી સરકારની આ પહેલ શિક્ષણ ક્ષેત્રમાં કામ કરતા લાખો પરિવારો માટે દિવાળી પહેલા મોટી ભેટથી ઓછી માનવામાં આવી રહી નથી. મુખ્યમંત્રી યોગી આદિત્યનાથ દ્વારા શિક્ષક દિવસ પર તમામ શિક્ષકોને આ મોટી ભેટ આપવામાં આવી છે. આ નિર્ણયથી ઉત્તરપ્રદેશના 9 લાખ પરિવારોને ફાયદો થશે. મુખ્યમંત્રી યોગી આદિત્યનાથે કહ્યું કે,  તેમની સેવાને ધ્યાનમાં રાખીને સરકારે તેમના સ્વાસ્થ્ય અંગે આ ઐતિહાસિક નિર્ણય લીધો છે. મુખ્યમંત્રી યોગીએ આ પછી એમ પણ કહ્યું કે આગામી સમયમાં શિક્ષા મિત્ર અને પ્રશિક્ષકોના માનદ વેતનમાં વધારો કરવા માટે એક સમિતિની પણ રચના કરવામાં આવી છે. સમિતિનો રિપોર્ટ ટૂંક સમયમાં આવવાનો છે, જેના પછી તેમના માનદ વેતનમાં વધારો કરવામાં આવશે.