રાજધાની ઢાકામાં ફરી એકવાર હિંસા, નાતાલની પૂર્વસંધ્યાએ મોગબજાર વિસ્તારમાં થયેલા ક્રૂડ બોમ્બ વિસ્ફોટમાં 21 વર્ષીય યુવાનનું ઘટનાસ્થળે જ મોત

દેશનિકાલ કરાયેલા બાંગ્લાદેશ નેશનાલિસ્ટ પાર્ટી (BNP) ના નેતા તારિક રહેમાનની સંભવિત વાપસી અગાઉ રાજધાની ઢાકામાં ફરી એકવાર હિંસાની ઘટના બની હતી. નાતાલની પૂર્વસંધ્યાએ મોગબજાર વિસ્તારમાં થયેલા ક્રૂડ બોમ્બ વિસ્ફોટમાં 21 વર્ષીય યુવાનનું ઘટનાસ્થળે જ મોત થયું. આ ઘટનાએ રાજધાનીની સુરક્ષા અને રાજકીય વાતાવરણ પર ગંભીર પ્રશ્નો ઉભા કર્યા છે. 

પોલીસના જણાવ્યા અનુસાર, બુધવારે સાંજે લગભગ 7:10 વાગ્યે અજાણ્યા હુમલાખોરોએ મોગબજાર ફ્લાયઓવર પરથી નીચે રસ્તા પર એક શક્તિશાળી ક્રૂડ બોમ્બ ફેંક્યો હતો. બોમ્બ રસ્તા પર ચાલી રહેલા યુવાનના માથા પર પડ્યો હતો જેના કારણે તેનું તાત્કાલિક મૃત્યુ થયું. વિસ્ફોટથી સમગ્ર વિસ્તારમાં ગભરાટ ફેલાઈ ગયો.

મૃતકની ઓળખ

મૃતકની ઓળખ 21 વર્ષીય સૈફુલ સ્યામ તરીકે થઈ છે. તે મોગબજાર વિસ્તારમાં એક ઓટોમોબાઈલ એસેસરીઝની દુકાનમાં કામ કરતો હતો. પોલીસે જણાવ્યું કે હુમલો થયો ત્યારે સૈફૂલ નજીકની દુકાનમાંથી નાસ્તો ખરીદવા ગયો હતો. ઘટનાસ્થળે ચાની દુકાનના માલિક ફારુકે કહ્યું, "અચાનક એક જોરદાર વિસ્ફોટ થયો. મેં સૈફૂલને જમીન પર પડતા જોયો. તેના માથામાંથી લોહી વહેતું હતું અને પરિસ્થિતિ ભયાનક હતી.

હાટિરઝીલ પોલીસ સ્ટેશન વિસ્તારના ન્યૂ એસ્કાટન વિસ્તારમાં વિસ્ફોટ થયો, જ્યાં એસેમ્બલીઝ ઓફ ગોડ (એજી) ચર્ચ અને બાંગ્લાદેશ મુક્તિ યોદ્ધા સંસદ સેન્ટ્રલ કમાન્ડ ઓફિસ આવેલી છે. આ સંવેદનશીલ વિસ્તારમાં થયેલા વિસ્ફોટથી સુરક્ષા ચિંતાઓ વધુ વધી ગઈ છે.