• રાજ્યમાં વિધિવત રીતે ચોમાસાની શરૂઆત

• વીત્યા 24 કલાકમાં 130 તાલુકામાં વરસાદ

• સૌરાષ્ટ્રથી દક્ષિણ ગુજરાત સુધી વરસાદી માહોલ જામ્યો

• રાજ્યમાં પાંચ દિવસ ઓરેન્જ અને યલો એલર્ટ જાહેર

• ભારે વરસાદની હવામાન વિભાગની આગાહી  

ગુજરાતમાં ચોમાસાની પધરામણી થઈ ચૂકી છે,સૌરાષ્ટ્ર, દક્ષિણ ગુજરાતમાં ભારે વરસાદ પડશે,તો અમદાવાદ સહિત ઉત્તર અને મધ્ય ગુજરાતને પણ ચોમાસુ ધમરોળે તેવી આગાહી હવામાન વિભાગે કરી છે. ત્યારે રાજ્યમાં છેલ્લા 24 કલાકમાં 130 તાલુકામાં વરસાદ નોંધાયો છે.

ગુજરાતમાં ચોમાસાનું વિધિવત રીતે આગમન થયું છે,વીજળીના કડાકા ભડાકા અને વાદળોની ગર્જનાઓ સાથે મેઘરાજાએ પધરામણી કરી છે.રાજ્યમાં છેલ્લા 24 કલાકમાં 130 તાલુકામાં વરસાદ નોંધાયો છે.જેમાં સૌથી વધુ ડભોઇમાં 6 ઈંચ, સંખેડામાં 5 ઈંચ, ઉમરપાડામાં 3.5 ઇંચ, ઉમરગામમાં 3.5 ઇંચ, આહવામાં 3.5 ઇંચ, શિહોરમાં 3 ઈંચ વરસાદ નોંધાયો હતો. આ ઉપરાંત પાલનપુરમાં 2.8 ઈંચ, ખાંભામાં 2.6 ઇંચ, કામરેજમાં 2.4 ઈંચ, માંગરોળ 2.2 ઈંચ, વઘઇમાં 2.4 ઈંચ, તારાપુર અને વલ્લભીપુરમાં 2-2 ઈંચ વરસાદ નોંધાયો હતો.

હવામાન વિભાગની આગાહી મુજબ, રાજ્યમાં આજે અમરેલી, ભાવનગર, ભરૂચ, સુરત, તાપી, ડાંગ, નવસારી, વલસાડ જિલ્લામાં ગાજવીજ સાથે ભારેથી અતિભારે વરસાદને લઈને ઓરેન્જ એલર્ટ જાહેર કર્યું છે. જ્યારે સાબરકાંઠા, અરવલ્લી, મોરબી, રાજકોટ, બોટાદ, જૂનાગઢ, ગીર સોમનાથ, આણંદ, વડોદરા, છોટા ઉદેપુર અને નર્મદા જિલ્લાના છૂટાછવાયા સ્થળોએ ભારે વરસાદને પગલે યલો એલર્ટ જાહેર કર્યું છે.

જ્યારે 17મી જૂને ભાવનગરમાં ઓરેન્જ એલર્ટ અને કચ્છ, મોરબી, સુરેન્દ્રનગર, રાજકોટ, જામનગર, અમરેલી, દેવભૂમિ દ્વારકા, અમદાવાદ, આણંદ, ખેડા, ભરૂચ, સુરત, તાપી, નવસારી, ડાંગ, વલસાડ જિલ્લામાં ભારે વરસાદને પગલે હવામાન વિભાગે યલો એલર્ટ જાહેર કર્યું છે.

રાજ્યમાં 18મી જૂનના રોજ કચ્છ, જામનગર, દેવભૂમિ દ્વારકા, પોરબંદર, સુરત, તાપી, નવસારી, ડાંગ, વલસાડ જિલ્લામાં અને 19 જૂને ભરૂચ, નર્મદા, સુરત, તાપી, ડાંગ, નવસારી, વલસાડ, ગીર સોમનાથ, અમરેલી, ભાવનગર જિલ્લાના છૂટાછવાયા સ્થળોએ ગાજવીજ સાથે ભારે વરસાદને લઈને યલો એલર્ટ જાહેર કર્યું છે. જ્યારે 20મી અને 21મી જૂનના રોજ નવસારી, વલસાડ જિલ્લામાં ભારે વરસાદની ચેતવણી આપવામાં આવી છે.