IND Vs BAN : ભારતે વનડે શ્રેણીની ત્રીજી મેચમાં બાંગ્લાદેશને 227 રનથી હરાવ્યું

ભારતે વનડે શ્રેણીની ત્રીજી મેચમાં બાંગ્લાદેશને ખરાબ રીતે હરાવ્યું હતું. ટીમ ઈન્ડિયાએ 227 રનની ઐતિહાસિક જીત નોંધાવી હતી. ટીમ માટે ઈશાન કિશને બેવડી સદી ફટકારી હતી. જ્યારે વિરાટ કોહલીએ સદી ફટકારી હતી. શાર્દુલ ઠાકુર અને અક્ષર પટેલ બોલિંગમાં ઝળક્યા હતા. જોકે ટીમ ઈન્ડિયા આ સિરીઝ 1-2થી હારી ગઈ હતી. બાંગ્લાદેશે શ્રેણીની પ્રથમ બે મેચમાં રોમાંચક જીત નોંધાવી હતી. તેના માટે શાકિબ અલ હસને ત્રીજી મેચમાં સૌથી વધુ 43 રન બનાવ્યા હતા.

ODI ફોર્મેટમાં ટીમ ઈન્ડિયાની આ ત્રીજી સૌથી મોટી જીત છે. વનડેમાં ભારતની સૌથી મોટી જીત 2007માં બર્મુડા પર હતી. જેમાં તેણે 257 રનથી જીત મેળવી હતી. આ પછી ટીમ ઈન્ડિયાએ હોંગકોંગને 256 રનથી હરાવ્યું. હવે ભારતે બાંગ્લાદેશને 227 રનથી હરાવ્યું છે.

ટીમ ઈન્ડિયા દ્વારા આપવામાં આવેલા ટાર્ગેટનો પીછો કરવા માટે બાંગ્લાદેશની શરૂઆત સારી રહી ન હતી. ટીમની પ્રથમ વિકેટ અનામુલ હકના રૂપમાં પડી હતી. તે 8 રન બનાવીને આઉટ થયો હતો. કેપ્ટન લિટન દાસ 29 રન બનાવીને પેવેલિયન પરત ફર્યો હતો. તેણે 26 બોલનો સામનો કર્યો અને 4 ચોગ્ગા અને 1 છગ્ગા ફટકાર્યા. શાકિબ અલ હસને 50 બોલમાં 43 રન બનાવ્યા હતા. તેણે 4 ચોગ્ગા ફટકાર્યા હતા.