પાકિસ્તાને ફાઈનલમાં બાંગ્લાદેશને હરાવીને એશિયા કપ રાઇઝિંગ સ્ટાર્સ 2025નું ટાઈટલ જીત્યું

પાકિસ્તાને ફાઈનલમાં બાંગ્લાદેશને હરાવીને એશિયા કપ રાઇઝિંગ સ્ટાર્સ 2025નું ટાઈટલ જીત્યું છે. સુપર ઓવરમાં રમાયેલી મેચમાં પાકિસ્તાને બાંગ્લાદેશ પર રોમાંચક વિજય મેળવ્યો હતો. બાંગ્લાદેશે સુપર ઓવરમાં 7 રનનો લક્ષ્યાંક આપ્યો હતો, જે પાકિસ્તાની બેટ્સમેનોએ માત્ર 4 બોલમાં જ મેળવી લીધો. બંને ટીમોનો દાવ 125 રન પર સમાપ્ત થયો, ત્યારબાદ પાકિસ્તાને સુપર ઓવર જીતીને એશિયા કપ રાઇઝિંગ સ્ટાર્સનું ટાઈટલ જીત્યું છે. 

બાંગ્લાદેશ સુપર ઓવરમાં ફક્ત 6 રન જ બનાવી શક્યું હતું. બાંગ્લાદેશે 3 બોલમાં જ પોતાની બંને વિકેટ ગુમાવી દીધી. આ દરમિયાન, પાકિસ્તાની બેટ્સમેનોએ પહેલા બે બોલ પર સિંગલ લીધા પછી ત્રીજા બોલ પર ફોર ફટકારી અને પછી ચોથા બોલ પર રન બનાવીને જીત સુનિશ્ચિત કરી હતી. 

આ ફાઇનલ મેચમાં બાંગ્લાદેશ A એ ટોસ જીતીને પહેલા બોલિંગ કરવાનો નિર્ણય લીધો હતો. આ નિર્ણય સાચો સાબિત થયો, કારણ કે પાકિસ્તાની ટીમ 125 રનમાં ઓલઆઉટ થઈ ગઈ. પાકિસ્તાન માટે ફક્ત માઝ સદાકત (28 રન), અરાફત મિન્હાસ (25 રન) અને સાદ મસૂદ (38 રન) બે આંકડા સુધી પહોંચ્યા હતા. બાંગ્લાદેશ તરફથી રિપોન મોંડલે ત્રણ અને રકીબુલ હસને બે વિકેટ લીધી હતી. 

જ્યારે બાંગ્લાદેશ બેટિંગ કરવા આવ્યું ત્યારે તેઓ એક પણ વિકેટ ગુમાવ્યા વિના 22 રન બનાવી ચૂક્યા હતા. જોકે, બાદમાં બાંગ્લાદેશે આગામી 31 રનમાં સાત વિકેટ ગુમાવી દીધી. પાકિસ્તાનનો વિજય લગભગ નિશ્ચિત લાગતો હતો, પરંતુ રકીબુલ હસન અને એસએમ મેહરોબે 37 રનની ભાગીદારી ઉમેરીને મેચમાં ઉત્સાહ ઉમેર્યો હતો. 

જ્યારે રકીબુલ હસન 96 રનના સ્કોર પર 24 રન બનાવીને આઉટ થયો, ત્યારે એવું લાગતું હતું કે બાંગ્લાદેશનો પરાજય નિશ્ચિત છે. જોકે, રિપોન મંડલ અને અબ્દુલ ગફર સકલૈને હાર માની નહીં અને 29 રનની ભાગીદારી કરીને મેચ ડ્રો કરી હતી.  પરિણામે, બંને ટીમો 125-125 રન પર બરાબરી પર રહી. પાકિસ્તાને સુપર ઓવર જીતી લીધી હતી.