ભારત અને દક્ષિણ આફ્રિકા વચ્ચે 3 મેચની વનડે શ્રેણીનો બીજી મેચ આજે રાયપુરના શહીદ વીર નારાયણ સિંહ ઇન્ટરનેશનલ સ્ટેડિયમમાં રમાશે

ભારત અને દક્ષિણ આફ્રિકા વચ્ચે 3 મેચની વનડે શ્રેણીનો બીજો અને નિર્ણાયક મુકાબલો બુધવાર, 3 December ના રોજ રાયપુરના શહીદ વીર નારાયણ સિંહ ઇન્ટરનેશનલ સ્ટેડિયમમાં રમાશે. રાંચીમાં રમાયેલી પ્રથમ મેચમાં ભારતે 17 રનથી રોમાંચક વિજય મેળવીને શ્રેણીમાં 1-0 ની લીડ મેળવી લીધી છે. હવે કેપ્ટન કેએલ રાહુલની નજર રાયપુરમાં જ શ્રેણી કબજે કરવા પર રહેશે. જોકે, અહીં ટોસ અત્યંત મહત્વની ભૂમિકા ભજવશે કારણ કે ઝાકળ (Dew) મેચનું પાસું પલટી શકે છે. વિરાટ કોહલી અને રોહિત શર્માનું ફોર્મ ભારત માટે પ્લસ પોઈન્ટ છે, પરંતુ દક્ષિણ આફ્રિકાના મધ્યમ ક્રમની લડાયક વૃત્તિને અવગણી શકાય નહીં.

પ્રથમ મેચનો ચિતાર અને ખેલાડીઓનું ફોર્મ

પ્રથમ વનડેમાં ભારતીય બેટ્સમેનોએ શાનદાર પ્રદર્શન કર્યું હતું. ખાસ કરીને વિરાટ કોહલીએ 135 રનની તોફાની ઈનિંગ રમીને અને રોહિત શર્મા સાથે સદીની ભાગીદારી નોંધાવીને ટીમને 349 રન સુધી પહોંચાડી હતી. કેપ્ટન કેએલ રાહુલે પણ મહત્વનું યોગદાન આપ્યું હતું. બીજી તરફ, દક્ષિણ આફ્રિકાનો ટોપ ઓર્ડર ભલે ફ્લોપ રહ્યો હોય અને માત્ર 11 રનમાં 3 વિકેટ ગુમાવી હોય, પરંતુ મેથ્યુ બ્રીટ્ઝકે, માર્કો જેન્સન અને કોર્બિન બોશ જેવા મધ્યમ ક્રમના બેટ્સમેનોએ મેચને છેલ્લી ઓવર સુધી ખેંચીને ભારતની ચિંતા વધારી દીધી હતી.

રાયપુર પિચ રિપોર્ટ: બેટ્સમેન કે બોલર, કોને મળશે મદદ?

પેસ બોલર્સને ફાયદો: અહીંની પિચ પર ઝડપી બોલરોને સારી મદદ અને ઉછાળો મળવાની શક્યતા છે. આ સ્થિતિમાં નવા બોલ સાથે ભારતના હર્ષિત રાણા અને અર્શદીપ સિંહ ઘાતક સાબિત થઈ શકે છે. રોહિત અને યશસ્વીએ શરૂઆતમાં સંભાળીને રમવું પડશે.

ઇતિહાસ: આ મેદાન પર 2023 માં ભારત અને ન્યુઝીલેન્ડ વચ્ચે રમાયેલી એકમાત્ર વનડેમાં કિવી ટીમ માત્ર 108 રનમાં ઓલઆઉટ થઈ ગઈ હતી અને રોહિત શર્માએ અડધી સદી ફટકારી હતી.

ટોસ અને ઝાકળ: હાલના હવામાનને જોતા રાત્રે ઝાકળ પડવાની પૂરી શક્યતા છે. જે ટીમ ટોસ જીતશે તે પહેલા બોલિંગ કરવાનું પસંદ કરશે, કારણ કે બીજી ઈનિંગમાં ભીના બોલ સાથે બોલિંગ કરવી મુશ્કેલ બનશે. ઉલ્લેખનીય છે કે, ટીમ ઈન્ડિયા છેલ્લી સળંગ 19 વનડે મેચમાં ટોસ હારી ચૂકી છે, જે ચિંતાનો વિષય છે.

સંભવિત પ્લેઈંગ 11 અને ફેરફારો

ભારતીય ટીમ જીતના લયને જાળવી રાખવા માટે વિનિંગ કોમ્બિનેશન સાથે જ ઉતરે તેવી શક્યતા છે. બીજી તરફ, દક્ષિણ આફ્રિકા નિયમિત કેપ્ટન ટેમ્બા બાવુમાને પરત લાવી શકે છે.

ભારત (સંભવિત): રોહિત શર્મા, યશસ્વી જયસ્વાલ, વિરાટ કોહલી, ઋતુરાજ ગાયકવાડ/તિલક વર્મા, કેએલ રાહુલ (કેપ્ટન & વિકેટકીપર), વોશિંગ્ટન સુંદર, રવિન્દ્ર જાડેજા, કુલદીપ યાદવ, હર્ષિત રાણા, અર્શદીપ સિંહ, પ્રસિદ્ધ કૃષ્ણા.

દક્ષિણ આફ્રિકા (સંભવિત): એડન માર્કરામ/ટેમ્બા બાવુમા (કેપ્ટન), રાયન રિકેલ્ટન, ક્વિન્ટન ડી કોક, મેથ્યુ બ્રીટ્ઝકે, ડેવાલ્ડ બ્રેવિસ, માર્કો જેન્સન, કોર્બિન બોશ, પ્રેનેલન સબ્રેઇન, નાન્ડ્રે બર્ગર, ઓટનીલ બાર્ટમેન.

કોનું પલડું ભારે?

ભારતીય ટોપ ઓર્ડર (રોહિત, કોહલી, રાહુલ) જબરદસ્ત ફોર્મમાં છે. જો યશસ્વી જયસ્વાલ લયમાં આવે તો ભારત મોટો સ્કોર કરી શકે છે. જોકે, દક્ષિણ આફ્રિકાના બેટ્સમેનો ગતિ (Pace) સામે સારું રમે છે, તેથી રાયપુરની પિચ તેમને રાસ આવી શકે છે. મુલાકાતી ટીમ શ્રેણી બરાબર કરવા માટે એડીચોટીનું જોર લગાવશે, તેથી મુકાબલો રસાકસીભર્યો રહેવાની ધારણા છે.

મેચ ક્યારે અને ક્યાં જોવી?

તારીખ: 3 December, બુધવાર

સમય: બપોરે 1:30 વાગ્યે (ટોસ 1:00 વાગ્યે)

પ્રસારણ: સ્ટાર સ્પોર્ટ્સ નેટવર્ક અને JioHotstar એપ પર લાઈવ.