Women World Cup 2025 : ભારતીય ટીમની જીત બાદ ઇનામોનો વરસાદ, BCCI ટીમને ₹51 કરોડની ઇનામી રકમ આપશે

ભારતીય મહિલા ક્રિકેટ ટીમે 2025 ODI વર્લ્ડ કપ જીતીને ઇતિહાસ રચ્યો. 2 નવેમ્બર રવિવારના રોજ નવી મુંબઈમાં ડીવાય પાટિલ સ્પોર્ટ્સ એકેડેમી ખાતે યોજાયેલી ફાઇનલ મેચમાં ભારતે દક્ષિણ આફ્રિકાને 52 રનથી હરાવ્યું. આ ભારતીય મહિલા ટીમનો પ્રથમ વર્લ્ડ કપ ખિતાબ હતો. અને ભારતની આ જીત સાથે જ દક્ષિણ આફ્રિકાની ટીમનું ટાઇટલ જીતવાનું સ્વપ્ન ચકનાચૂર થઈ ગયું.

ભારતીય ટીમની જીત બાદ ઇનામોનો વરસાદ થઈ રહ્યો છે. ભારતીય ક્રિકેટ કંટ્રોલ બોર્ડ (BCCI) એ ખેલાડીઓ અને ટીમ સપોર્ટ સ્ટાફ માટે એક મોટી જાહેરાત કરી છે. BCCI ભારતીય ટીમને ₹51 કરોડની ઇનામી રકમ આપશે. BCCI સચિવ દેવજીત સૈકિયાએ આ વાતની પુષ્ટિ કરી છે. આ પહેલી વાર છે જ્યારે ભારતીય મહિલા ટીમને આટલી મોટી ઇનામી રકમ મળશે.

દેવજીત સૈકિયાએ કહ્યું કે આ જીત ભારતમાં મહિલા ક્રિકેટના ભવિષ્યને નવી દિશા આપશે અને ખેલાડીઓની આગામી પેઢીને પ્રેરણા આપશે. તેમણે ICC (આંતરરાષ્ટ્રીય ક્રિકેટ કાઉન્સિલ) ના ચેરમેન અને BCCI ના ભૂતપૂર્વ સચિવ જય શાહનો મહિલા ખેલાડીઓ માટે જરૂરી પગલાં લેવા બદલ આભાર માન્યો.

દેવજીત સૈકિયાએ કહ્યું, "જય શાહના નેતૃત્વમાં મહિલા ક્રિકેટમાં નોંધપાત્ર ફેરફારો થયા છે. પગાર સમાનતા પર પણ ધ્યાન આપવામાં આવ્યું છે. તાજેતરમાં મહિલા વર્લ્ડ કપ માટે ઈનામી રકમ 300 ટકા વધારીને $2.88 મિલિયનથી લગભગ $14 મિલિયન કરવામાં આવી છે. આ પગલાંથી મહિલા ક્રિકેટમાં નોંધપાત્ર વધારો થયો છે. BCCI એ ખેલાડીઓ, કોચ અને સપોર્ટ સ્ટાફ માટે 51 કરોડના ઈનામની પણ જાહેરાત કરી છે."