વર્લ્ડ કપ 2023 : ન્યૂઝીલેન્ડે અફઘાનિસ્તાનને 149 રનથી હરાવ્યું, ટૂર્નામેન્ટમાં સતત ચોથી જીત મેળવી
ન્યૂઝીલેન્ડે વર્લ્ડ કપ 2023ની 16મી મેચમાં અફઘાનિસ્તાનને 149 રનથી હરાવ્યું અને ટૂર્નામેન્ટમાં સતત ચોથી જીત મેળવી. મેચમાં પહેલા ન્યુઝીલેન્ડના બેટ્સમેનોએ જોરદાર પ્રદર્શન કર્યું અને પછી બોલિંગ વિભાગે તબાહી મચાવીને અફઘાનિસ્તાનને 139 રનમાં આઉટ કરી દીધી. ટોસ હારીને પ્રથમ બેટિંગ કરવા ઉતરેલી કિવી ટીમે 50 ઓવરમાં 6 વિકેટે 288 રન બનાવ્યા હતા. ટીમ તરફથી ગ્લેન ફિલિપ્સે 71 રન અને કેપ્ટન ટોમ લાથમે 68 રન બનાવ્યા હતા. જ્યારે બોલિંગમાં ફર્ગ્યુસન અને સેન્ટનરે 3-3 વિકેટ લીધી હતી.
રનનો પીછો કરવા આવેલી અફઘાનિસ્તાનની ટીમ 34.4 ઓવરમાં ઓલઆઉટ થઈ ગઈ હતી. ટીમ માટે રહેમત શાહે સૌથી મોટી 36 રનની ઇનિંગ રમી જેમાં 1 ફોરનો સમાવેશ થાય છે. આ સાથે જ ટીમનો કોઈપણ બેટ્સમેન મોટી ઈનિંગ રમી શક્યો નહોતો. ટીમે શરૂઆતથી અંત સુધી સતત વિકેટો ગુમાવી હતી.
અફઘાનિસ્તાનને પહેલો ફટકો 27 રનના સ્કોર પર છઠ્ઠી ઓવરમાં રહેમાનુલ્લાહ ગુરબાઝના રૂપમાં લાગ્યો હતો, જે 11 રન બનાવીને પેવેલિયન ભેગો થયો હતો. ત્યારબાદ બીજી ઓવરમાં બીજા ઓપનર ઈબ્રાહિમ ઝરદાન 14 રન બનાવીને ટ્રેન્ટ બોલ્ટનો શિકાર બન્યો હતો. આ પછી 14મી ઓવરના છેલ્લા બોલ પર કેપ્ટન હશમતુલ્લાહ શાહિદી (8)ને લોકી ફર્ગ્યુસને પેવેલિયન મોકલ્યો હતો. જો કે આ પછી થોડા સમય માટે અફઘાનિસ્તાનની વિકેટો પર અંકુશ રહ્યો હતો, પરંતુ 26મી ઓવરમાં ટ્રેન્ટ બોલ્ટે અઝમતુલ્લા ઓમરઝાઈ (27)ને કીપરના કેચ દ્વારા આઉટ કર્યો હતો.
