WPL 2023 : બેટનો સ્પોન્સર ન મળતા ધોનીનું નામ લખીને બેટિંગ કરવા ઉતરી કિરણ નવગીરે, રમી તોફાની ઇનિંગ..!

વિમેન્સ પ્રીમિયર લીગમાં રવિવારે રમાયેલી રોમાંચક મેચમાં યુપી વોરિયર્સે ગુજરાત જાયન્ટ્સને એક બોલ બાકી રહેતા ત્રણ વિકેટે હરાવ્યું હતું. આ મેચમાં યુપીના ગ્રેસ હેરિસે 26 બોલમાં 59 રનની અણનમ તોફાની ઇનિંગ રમી હતી. જો કે આ જીતનો પાયો કિરણ નવગીરે નાખ્યો હતો. તેણે સાવચેતીપૂર્વક બેટિંગ કરતા 43 બોલમાં 53 રન બનાવ્યા હતા. તેણે પોતાની ઇનિંગમાં 5 ચોગ્ગા અને 2 છગ્ગા ફટકાર્યા હતા. તેની ઇનિંગ્સે યુપીની ટીમને ચેઝ કરવાનો મોકો આપ્યો હતો જે હેરિસે પૂર્ણ કર્યો હતો. કિરણે માત્ર પોતાની બેટિંગથી જ નહીં પરંતુ તેના બેટથી પણ ફેન્સનું ધ્યાન ખેંચ્યું હતું.

મીડિયા અહેવાલો અનુસાર, કિરણને બેટનો કોઈ સ્પોન્સર મળ્યો ન હતો. તેથી તે તેના આદર્શ મહેન્દ્ર સિંહ ધોનીના MSD અને તેની જર્સી નંબર 07 (સાત) લખીને મેદાન પર બેટિંગ કરવા આવી હતી. કિરણ ખૂબ જ ગરીબ પરિવારમાંથી આવે છે. જો કે ક્રિકેટમાં તેના ઘણા મોટા રેકોર્ડ છે. કિરણે માત્ર ક્રિકેટમાં જ નહીં પરંતુ એથ્લેટિક્સની દુનિયામાં પણ નામ કમાવ્યું છે.