આર્જેન્ટિનાની ધરતી ધ્રુજી, ભૂકંપની તીવ્રતા રિક્ટર સ્કેલ પર 7.4 માપવામાં આવી

ભૂકંપના જોરદાર ઝટકાથી આર્જેન્ટિનાની ધરતી ધ્રુજી ઉઠી છે. ભૂકંપની તીવ્રતા રિક્ટર સ્કેલ પર 7.4 માપવામાં આવી હતી.

ભૂકંપની તીવ્રતાનો અંદાજ એ વાત પરથી લગાવી શકાય છે કે આર્જેન્ટિનાથી ચિલી સુધી ધરતી ધ્રુજી ઉઠી હતી. ભૂકંપની તીવ્રતાને ધ્યાનમાં રાખીને સુનામીની ચેતવણી જારી કરવામાં આવી છે. ભૂકંપના તીવ્ર આંચકાથી લોકોમાં ગભરાટ ફેલાયો હતો. લોકો પોતાના ઘરો છોડીને ખુલ્લા આકાશ તરફ દોડવા લાગ્યા હતા.

યુનાઇટેડ સ્ટેટ્સ જિયોલોજિકલ સર્વે અનુસાર, દક્ષિણ આર્જેન્ટિનામાં ઉશુઆઈયાથી 219 કિલોમીટર દક્ષિણમાં ડ્રેક પેસેજમાં ભૂકંપનો આંચકો અનુભવાયો હતો. ભૂકંપ પછી તરત જ સુનામીની ચેતવણી જારી કરવામાં આવી હતી, જેના પગલે અધિકારીઓએ લોકોને દરિયાકાંઠાથી દૂર જવા અને સુરક્ષિત સ્થળોએ જવાની અપીલ કરી હતી. અમેરિકાની સુનામી ચેતવણી પ્રણાલીએ ભૂકંપના કેન્દ્રથી 300 કિલોમીટરની અંદર દરિયાકાંઠાના વિસ્તારો માટે ખતરનાક મોજાઓની ચેતવણી જારી કરી છે. આર્જેન્ટિના ઉપરાંત, ચિલીના કેટલાક ભાગો પણ તેના કાર્યક્ષેત્રમાં આવે છે.