બાયડન સરકારે ભારતીયો માટે શરુ કરી નવી સુવિધા, વિદેશમાં પણ મળી જશે અમેરિકાના વીઝા

ભારતીયો માટે યુએસ વિઝાની પ્રતીક્ષા અવધિ ઓછી થઈ રહી નથી. દેશના ઘણા ભાગોમાં, તે હજી 500 દિવસથી વધુનો સમય છે. જેને જોતા અમેરિકન એમ્બેસીએ એક મહત્વનું પગલું ભર્યું છે. આ અંતર્ગત અન્ય દેશમાં પ્રવાસ કરનારા ભારતીયો ત્યાંની અમેરિકી એમ્બેસીમાં જઈને અમેરિકાના વિઝા માટે એપોઈન્ટમેન્ટ મેળવી શકે છે. અમેરિકન એમ્બેસી ઈન્ડિયા દ્વારા આ અંગે માહિતી આપતું એક ટ્વીટ પણ કરવામાં આવ્યું છે. નોંધપાત્ર વાત એ છે કે, અમેરિકા પહેલેથી જ ભારતીયો માટે વિઝાનો બેકલોગ ઘટાડવાનો પ્રયાસ કરી રહ્યું છે.

અમેરિકન એમ્બેસી ઇન્ડિયાએ આ ટ્વિટમાં કહ્યું છે કે શું તમે કોઇ ઇન્ટરનેશનલ ટ્રાવેલ કરવા જઇ રહ્યા છો? જો હા, તો તમે જે દેશમાં મુસાફરી કરી રહ્યા છો તે દેશમાં યુએસ એમ્બેસીમાં વિઝા માટે તમે એપોઇન્ટમેન્ટ મેળવી શકો છો. આ ટ્વિટમાં ઉદાહરણ આપીને આ વાતનો ખુલાસો કરવામાં આવ્યો છે. આ મુજબ બેંગકોક સ્થિત અમેરિકન એમ્બેસીએ આગામી મહિનાઓમાં થાઇલેન્ડની યાત્રા કરનારા ભારતીયો માટે બી1/બી2 વિઝા એપોઇન્ટમેન્ટની સુવિધા આપી છે.