કેનેડાના વડાપ્રધાન જસ્ટિન ટ્રુડોએ કરી છૂટાછેડાની જાહેરાત, સોફી ગ્રેગોઇર સાથે 18 વર્ષના લગ્નજીવનનો અંત….

કેનેડાના વડાપ્રધાન જસ્ટિન ટ્રુડો અને તેમની પત્ની સોફી ગ્રેગોઇર ટ્રુડોએ અલગ થવાનો નિર્ણય લીધો છે. ટ્રુડોએ તેમના ઇન્સ્ટાગ્રામ એકાઉન્ટ પર પોસ્ટ કરેલા મેસેજમાં લખ્યું, "સોફી અને હું એ હકીકત શેર કરવા માગીએ છીએ કે ઘણી અર્થપૂર્ણ અને મુશ્કેલ વાતચીત પછી અમે અલગ થવાનો નિર્ણય લીધો છે." ટ્રુડો અને ગ્રેગોઇરએ મે 2005માં લગ્ન કર્યા હતા અને તેમને ત્રણ બાળકો છે: બે પુત્ર, ઝેવિયર અને હેડ્રિયન અને એક પુત્રી એલા-ગ્રેસ છે. 48 વર્ષની સોફી ગ્રેગોઇર ટ્રુડો ક્વિબેકમાં ટેલિવિઝન રિપોર્ટર પણ રહી ચૂક્યા છે. તેમણે 51 વર્ષીય જસ્ટિન ટ્રુડો સાથે ત્રણ ચૂંટણીઓ માટે પ્રચાર પણ કર્યો છે. તે ઘણી વખત મહિલાઓના અધિકારો અને માનસિક સ્વાસ્થ્ય સમસ્યાઓની હિમાયત કરતા જોવા મળ્યા છે. PMના કાર્યાલય દ્વારા જારી કરવામાં આવેલા એક નિવેદનમાં કહેવામાં આવ્યું હતું કે, 'તેઓએ એ સુનિશ્ચિત કરવા માટે કામ કર્યું છે કે અલગ થવાના તેમના નિર્ણયના સંબંધમાં તમામ કાયદાકીય અને નૈતિક પગલાં લેવામાં આવ્યા છે અને તેવું કરવાનું ચાલુ રાખશે.'