ડોનાલ્ડ ટ્રમ્પ સુનિતા વિલિયમ્સ અને બુચ વિલ્મોરને પોતાના ખિસ્સામાંથી ઓવર ટાઈમનો પગાર આપશે !

યુએસ રાષ્ટ્રપતિ ડોનાલ્ડ ટ્રમ્પે શનિવારે નાસાના અવકાશયાત્રીઓ સુનિતા વિલિયમ્સ અને બુચ વિલ્મોરને ઓવરટાઇમ પગાર આપવાની વાત કરી હતી. બંને અવકાશયાત્રીઓ 5 જૂન, 2024ના રોજ નાસાના સંયુક્ત 'ક્રૂ ફ્લાઇટ ટેસ્ટ મિશન' પર ગયા હતા.આ મિશન 8 દિવસનું હતું, પરંતુ અવકાશયાનના થ્રસ્ટર્સમાં સમસ્યાને કારણે, તે 9 મહિના સુધી આંતરરાષ્ટ્રીય અવકાશ મથક (ISS) પર અટવાયેલા રહ્યા. ઈલોન મસ્કના અવકાશયાનની મદદથી, તેમને 19 માર્ચે પાછા લાવવામાં આવ્યા.

નાસાના અવકાશયાત્રીઓને સરકારી કર્મચારી ગણવામાં આવે છે. તેમને અન્ય સરકારી કર્મચારીઓની જેમ પગાર મળે છે. એક્સટેન્ડેડ મિશન માટે કોઈ વધારાનો પગાર નથી - જેમાં ઓવરટાઇમ, સપ્તાહના અંતે અથવા રજાઓનો સમાવેશ થાય છે.અવકાશયાત્રીઓના પ્રવાસ, રહેવા અને ભોજનનો ખર્ચ નાસા ઉઠાવે છે. આ ઉપરાંત, તે નાના દૈનિક ખર્ચ માટે વધારાના 5 ડોલર (430 રૂપિયા) પણ આપે છે.સુનિતા વિલિયમ્સ અને બુચ વિલ્મોરનો પગાર અનુક્રમે $94,998 (રૂ. 81.69 લાખ) અને $123,152 (રૂ. 1.05 કરોડ) છે. આ ઉપરાંત, તેમને અવકાશમાં કુલ 286 દિવસ વિતાવવા બદલ $1,430 (રૂ. 1,22,980) મળશે.