જાપાનમાં ફરી એકવાર ભૂકંપની તીવ્રતા અનુભવાઈ, હોક્કાઇડો ટાપુ પર 5.7ની તીવ્રતાનો ભૂકંપ આવ્યો

જાપાનમાં ફરી એકવાર ભૂકંપની તીવ્રતા અનુભવાઈ છે. શુક્રવારે હોક્કાઇડો ટાપુ પર 5.7ની તીવ્રતાનો ભૂકંપ આવ્યો, જેના કારણે ઘણા વિસ્તારોમાં જોરદાર આંચકા અનુભવાયા. સદનસીબે, અત્યાર સુધી કોઈ જાનહાનિ કે ગંભીર નુકસાનના અહેવાલ નથી મળ્યા. 

નેશનલ સેન્ટર ફોર સિસ્મોલોજી (NCS) અનુસાર, ભૂકંપનું કેન્દ્ર હોક્કાઇડો ટાપુના ઉત્તર-પૂર્વ ભાગમાં અને આશરે 10 કિલોમીટર ઊંડાઈએ હતું. ભૂકંપનો સમય સ્થાનિક સમય પ્રમાણે સવારે નોંધાયો હતો. લોકો ઘરોમાંથી બહાર નીકળ્યા અને થોડીવાર માટે વીજ પુરવઠો પણ ખોરવાયો હોવાનું અહેવાલો જણાવે છે.

જાપાન “પેસિફિક રિંગ ઓફ ફાયર” તરીકે ઓળખાતા ભૂસ્તર ક્ષેત્રમાં આવેલો છે, જ્યાં પેસિફિક, ફિલિપાઇન સમુદ્ર, યુરેશિયન અને ઉત્તર અમેરિકન જેવી ચાર મોટી ટેક્ટોનિક પ્લેટો મળે છે. આ પ્લેટોની સતત હિલચાલને કારણે જાપાનમાં વારંવાર ભૂકંપ આવતાં રહે છે.તાજેતરના દિવસોમાં એશિયાના અનેક દેશોમાં ભૂકંપના આંચકા નોંધાયા છે. અફઘાનિસ્તાનમાં 4.3 ની તીવ્રતાનો ભૂકંપ આવ્યો હતો. પાકિસ્તાન–અફઘાનિસ્તાન સરહદે 3.7 ની તીવ્રતાના ઝટકા અનુભવાયા. તિબેટમાં આ અઠવાડિયાની શરૂઆતમાં 3.6ની તીવ્રતાનો ભૂકંપ નોંધાયો. આ સતત ભૂકંપીય ગતિવિધિઓને કારણે સમગ્ર એશિયન પ્રદેશમાં ચિંતા વધી રહી છે. તેમ છતાં નિષ્ણાતોનું માનવું છે કે, આ કુદરતી ટેક્ટોનિક પ્રક્રિયાનો જ એક ભાગ છે, પરંતુ મોટા ભૂકંપની શક્યતા નકારી શકાય તેવી નથી.