પાકિસ્તાનની સામાન્ય ચૂંટણીમાં પ્રથમ હિન્દુ મહિલા ઉમેદવાર, જાણો કોણ છે ડૉ. સવીરા પ્રકાશ.!

પાકિસ્તાનમાં સામાન્ય ચૂંટણીની તૈયારીઓ પૂરજોશમાં ચાલી રહી છે. ચૂંટણીની તારીખો જાહેર કરવામાં આવી છે. લાંબા સમયથી પાકિસ્તાનમાં સામાન્ય ચૂંટણીને લઈને ઉત્સુકતા હતી કે તે ક્યારે યોજાશે, પરંતુ તારીખોની જાહેરાત બાદ તેનો અંત આવી ગયો છે. હવે પાકિસ્તાનની સામાન્ય ચૂંટણી એક નવા કારણથી હેડલાઇન્સમાં છે. આ હેડલાઇન્સ બનાવવા પાછળનું કારણ પાકિસ્તાનની રાજનીતિમાં હિન્દુ મહિલાની એન્ટ્રી છે.

હા, તમે સાચું જ સાંભળ્યું, પાકિસ્તાન જેવા દેશમાં જ્યાં આપણે બધા લઘુમતી સમુદાયની સ્થિતિથી વાકેફ છીએ, ત્યાં હિન્દુ અને તે પણ એક મહિલા માટે પાકિસ્તાનના રાજકારણમાં પ્રવેશવું એ નાની વાત નથી. આ હિંદુ મહિલા કાર્ડ રમનાર પક્ષ બીજું કોઈ નહીં પરંતુ પાકિસ્તાનની સૌથી મોટી પાર્ટીઓમાંની એક પાકિસ્તાન પીપલ્સ પાર્ટી (PPP) છે. 16મી નેશનલ એસેમ્બલીના સભ્યોને ચૂંટવા માટે આવતા વર્ષે 8 ફેબ્રુઆરીએ પાકિસ્તાનમાં સામાન્ય ચૂંટણીઓ યોજાવાની છે.

કોણ છે ડૉ. સવીરા પ્રકાશ

ન્યૂઝ એજન્સી IANS અનુસાર, પાકિસ્તાની-હિંદુ ડૉ. સવીરા પ્રકાશ આગામી સામાન્ય ચૂંટણીમાં ખૈબર પખ્તુનખ્વા પ્રાંતના બુનેર જિલ્લામાંથી ઉભેલી લઘુમતી સમુદાયમાંથી પ્રથમ મહિલા ઉમેદવાર બનવા જઈ રહી છે. સવીરા પ્રકાશે 2022માં એબોટાબાદ ઈન્ટરનેશનલ મેડિકલ કોલેજમાંથી MBBS પૂર્ણ કર્યું. તેમના પિતા ઓમ પ્રકાશ તાજેતરમાં નિવૃત્ત થયેલા ડૉક્ટર, છેલ્લા 35 વર્ષથી પાર્ટીના સક્રિય સભ્ય હતા.

ડૉનના અહેવાલ મુજબ સવીરા પ્રકાશે 23 ડિસેમ્બરે PK-25 સામાન્ય બેઠક માટે પોતાનું નામાંકન પત્ર સબમિટ કર્યું છે. હાલમાં તે પાકિસ્તાન પીપલ્સ પાર્ટી (PPP)ની મહિલા પાંખના જનરલ સેક્રેટરી તરીકે સેવા આપે છે. પાર્ટી ડો. સવીરા પ્રકાશ પર દાવ લગાવવા તૈયાર છે.