નેપાળ સરકારે સોશિયલ મીડિયા પ્લેટફોર્મ પર લાદવામાં આવેલા પ્રતિબંધને પાછો ખેંચવાની કરી જાહેરાત

નેપાળ સરકારે સોમવારે સોશિયલ મીડિયા પ્લેટફોર્મ પર લાદવામાં આવેલા પ્રતિબંધને પાછો ખેંચવાની જાહેરાત કરી હતી.

યુવાનો દ્વારા કરવામાં આવેલા હિંસક વિરોધ પ્રદર્શનો વચ્ચે આ નિર્ણય લેવામાં આવ્યો હતો, જેમાં અત્યાર સુધીમાં ઓછામાં ઓછા 20 લોકો માર્યા ગયા છે અને 300થી વધુ લોકો ઘાયલ થયા છે.

નેપાળના સંદેશાવ્યવહાર, માહિતી અને પ્રસારણ મંત્રી પૃથ્વી સુબ્બા ગુરુંગે કેબિનેટની ઈમરજન્સી બેઠક બાદ જાહેરાત કરી હતી કે સરકારે સોશિયલ મીડિયા સાઇટ્સ પર લાદવામાં આવેલા પ્રતિબંધને પાછો ખેંચવાનો નિર્ણય લીધો છે.

ગુરુંગે કહ્યું હતું કે માહિતી મંત્રાલયે સંબંધિત એજન્સીઓને 'Gen Z' વિરોધીઓની માંગણી મુજબ સોશિયલ મીડિયા સાઇટ્સ ફરી શરૂ કરવાની પ્રક્રિયા શરૂ કરવાનો આદેશ આપ્યો છે. આ યુવાનો રાજધાની કાઠમંડુમાં સંસદ ભવનની સામે એક વિશાળ પ્રદર્શનનું નેતૃત્વ કરી રહ્યા હતા. ત્રણ દિવસ પહેલા નેપાળ સરકારે ફેસબુક અને એક્સ સહિત 26 સોશિયલ મીડિયા સાઇટ્સ પર પ્રતિબંધ મૂકવાનો આદેશ આપ્યો હતો કારણ કે તેઓ નેપાળ સરકાર સાથે નોંધણી કરાવવામાં નિષ્ફળ ગયા હતા.