સુશીલા કાર્કી બન્યા નેપાળના વચગાળાના વડાપ્રધાન

નેપાળમાં Gen-Zના નેતૃત્વમાં થયેલા હિંસક વિરોધ પ્રદર્શનો બાદ ઉદ્ભવેલા રાજકીય સંકટ વચ્ચે રાષ્ટ્રપતિ રામ ચંદ્ર પૌડેલે વર્તમાન સંસદ ભંગ કરી દીધી છે અને ભૂતપૂર્વ મુખ્ય ન્યાયાધીશ સુશીલા કાર્કીને વચગાળાની સરકારના વડા બનાવવાનો નિર્ણય લીધો છે. રાષ્ટ્રપતિ સાથે આર્મી ચીફ જનરલ અશોક રાજ સિગ્ડેલની હાજરીમાં Gen-Z જૂથોની બેઠકમાં, સુશીલા કાર્કીને વચગાળાની સરકારના વડા બનાવવા પર સર્વસંમતિ સધાઈ હતી. આ પછી, રાષ્ટ્રપતિ પૌડેલે પણ કાર્કીને મુલાકાત માટે બોલાવ્યા હતા અને તેમને આ જવાબદારી સંભાળવા વિનંતી કરી હતી, જેને નેપાળના ભૂતપૂર્વ મુખ્ય ન્યાયાધીશએ સ્વીકારી હતી.

આજે રાત્રે રાષ્ટ્રપતિ ભવનમાં શપથ લેશે. તમને જણાવી દઈએ કે ભ્રષ્ટાચાર, ભત્રીજાવાદ અને સોશિયલ મીડિયા પ્રતિબંધને લઈને 8 અને 9 સપ્ટેમ્બરના રોજ Gen-Zના નેતૃત્વમાં દેશવ્યાપી હિંસક વિરોધ પ્રદર્શનોને કારણે વડા પ્રધાન કેપી શર્મા ઓલીને રાજીનામું આપવાની ફરજ પડી હતી. Gen-Zના વિરોધીઓએ માંગ કરી હતી કે વર્તમાન સંસદ ભંગ કરવામાં આવે અને આગામી રાષ્ટ્રીય ચૂંટણીઓ સુધી દેશમાં વચગાળાની સરકાર બનાવવામાં આવે, જેને રાષ્ટ્રપતિ રામ ચંદ્ર પૌડેલે સેના પ્રમુખ સાથે પરામર્શ કર્યા પછી સ્વીકારી લીધી હતી.

વચગાળાની સરકાર હેઠળ એક નાનું મંત્રીમંડળ રચવાનું નક્કી છે. વરિષ્ઠ વકીલ ઓમ પ્રકાશ આર્યલ અને નેપાળ વીજળી સત્તામંડળના ભૂતપૂર્વ વડા કુલમન ઘીસિંગ મંત્રી બની શકે છે. વચગાળાની સરકારમાં GEN-Z જૂથોના એક કે બે પ્રતિનિધિઓનો પણ સમાવેશ થઈ શકે છે. સુશીલા કાર્કીના શપથ ગ્રહણ પછી વચગાળાની સરકારની પ્રથમ કેબિનેટ બેઠક રાષ્ટ્રપતિ ભવનમાં જ યોજાશે, જેમાં ન્યાયિક તપાસ પંચ અને ભ્રષ્ટાચાર સામે એક શક્તિશાળી તપાસ પંચ બનાવવાનો નિર્ણય લેવામાં આવી શકે છે.