આ ગુજરાતી ફિલ્મોના નામ વાંચીને તમે પણ હસીને લોટપોટ થઇ જશો

એક સમયે ગુજરાતી ફિલ્મ જગતમાં માનવીની ભવાઇ, ભવની ભવાઇ જેવી ભવ્ય ફિલ્મો બનતી હતી.જ્યારે હાલના સમયમાં ગુજરાતી ફિલ્મો પર નજર નાંખીએ તો ખ્યાલ આવે કે ફિલ્મોમાં આપણું સ્તર કેટલું નીચું ઉતરી ગયું છે. કેટલીક ઘણી ગાંઠી ફિલ્મોને બાદ કરતાં અમુક ફિલ્મોના તો નામ જ એવા હોય છે કે નામ જોઇને જ હસવું છૂટી જાય. તો ચાલો એક નજર કરીએ એવી ગુજરાતી ફિલ્મો પર જેનું નામ જ તમને હસાવી હસાવીને લોટ પોટ કરી દેશે.

મને મર્સિડિઝ લાગે તારી રિક્ષા

આ ફિલ્મનું નામ મર્સિડિઝવાળા વાંચી લે તો બિચારા આત્મહત્યા કરી લે. મર્સિડિઝ અને કારમાં કોઇ ફેર જ નહી બોલો.

અમે બીડી પીવાના!

હાલમાં ધુમ્રપાન કરતો સીન આવે તો પણ લખેલુ આવે છે કે આ હીરો કે હીરોઇન ધુમ્રપાનને સપોર્ટ નથી કરતા ત્યારે આ ફિલ્મના તો ટાઇટલમાં જ ખુલ્લમ ખુલ્લા કહેવામાં આવ્યું છે કે અમે બીડી પીવાના (થાય તે કરી લ્યો)

ડ્રાઇવર દિલવાળો

ભગવાન જાણે કેમ પણ ગુજરાતી ફિલ્મ બનાવનારોઓને ડ્રાઇવરો અને રિક્ષા, છકડા પ્રત્યે વધારે પ્રેમ ઉભરાય છે. ડ્રાઇવર દિલવાળો તો શું બીજા બધા દિલ વગરના છે.

રાધા તને લવ કરું કે બે વિઘા ધઉં કરું

આ ફિલ્મના ટાઇટલમાં હીરો જાણે કે હિરોઇનને કહે છે કે તારા પાછળ ટાઇમ બગાડુ એટલામાં તો મારા બે વિઘામાં ઘઉં ના ઉગાડી દઉં!

પ્રીત ઝૂકે નહીં સાથ છૂટે નહીં

વર્ષો પહેલાં એક હિન્દી ફિલ્મ આવી હતી પ્યાર ઝૂકતા નહી પણ બધી વાતે પૂરા એવા ગુજરાતીઓએ એમાં વળી નવુ ઉમેર્યુ, પ્રીત ઝૂકે નહી અને સાથ છૂટે નહી. મતલબ કે પ્રીત તો નહી જ ઝૂકે પણ સાથે સાથ ય નહી છૂટે.

દલડું દીધું મેં કારતકનાં મેળામાં

આ ફિલ્મના ટાઇટલ વાંચીને એવુ લાગે છે કે ભાઇ કારતકના મેળામાં ફરવા ગયા અને એટલી મોજ કરી કે કે દલડુ મેળામાં જ રહી ગયું.

છોગાળા છગનનો વરઘોડો

લ્યો કરો વાત વરઘોડા પર આખી ફિલ્મ બનાવી દીધી છે.

રસિયા તારી રાધા રોકાણી રણમાં

આ ફિલ્મનું ટાઇટલ વાંચીને એક વિચાર આવે કે રાધા રણમાં શું કરવા રોકાણી હશે.

લોહીનો નહીં એ કોઇ નો નહીં

આ ફિલ્મના ટાઇટલ પરથી તો ચહેરા સામે ડ્રેક્યુલા જ દેખાય.

પારકું બૈરૂ વ્હાલુ લાગે

ફિલ્મના ટાઇટલમાં જ ઘણાં પુરુષોના મન કી બાત કરવામાં આવી છે. લોકો ટાઇટલ જોઇને જ ફિલ્મ જોવા લલચાઇ જાય.

રિક્ષાવાળા આઇ લવ યૂ

ખરેખર ગુજરાતી ફિલ્મો બનાવનારાઓના લીધે રિક્ષાવાળાઓની વેલ્યુ મર્સિડિઝવાળાઓ કરતા પણ વધી ગઇ છે

આ સિવાય પણ અનેક ફિલ્મો છે જેમકે "મંગુડી માનતી નથી", "મરદનો માંડવો", "ટીમલી", "સરહદની પાર મારી રાધા", "દોઢ ડાહ્યા" વગેરે.