જામનગર: દાબેલી બ્રેડના રૂપિયાની ચુકવણી બાબતે યુવાનની કરાઇ હત્યા

જામનગરમાં જાણે હત્યાનો સિલસિલો અટકવાનું નામજ નથી લેતો, થોડા દિવસ પૂર્વે ઈંડા કરીની રેંકડી પર બબાલ થયા બાદ યુવકની હત્યાને હજુ થોડા જ દિવસો થયા છે. ત્યાં ફરી એક વખત બેડી વિસ્તારમાં રેંકડી પર હત્યાનો બનાવ બનતા લોકોમાં કાયદો અને વ્યવસ્થા અંગે સવાલો ઉભા થયા છે.

જામનગરના બેડી વિસ્તારમાં એકડેએક બાપુની જગ્યા નજીક દાબેલી બ્રેડની રેંકડી પાસે ગત રાત્રીના દાબેલી બ્રેડ ખાધા બાદ રૂપિયા નહીં આપતા ઉગ્ર બોલાચાલી થઈ હતી અને થોડા સમયમાં બોલાચાલીએ જૂથ અથડામણનું સ્વરૂપ ધારણ કર્યું હતું. જેમાં હત્યારાઓએ મૃતકના ઘેર જઇ બબાલ કરી હતી. આ ઘટનામાં મહેબૂ ઇલ્યાસ નામના યુવાનની હત્યા કરાઇ હતી. પોલીસે હત્યાના આઠ આરોપીઓ વિરુદ્ધ ગુન્હો નોંધી વધુ તપાસ હાથ ધરી છે.