રાજ્યમાં બોગસ ડૉક્ટર્સ પણ પોતાના નજીવા ફાયદા માટે લોકોના આરોગ્ય સાથે ચેડા કરી રહ્યા હોવાની વાત આરોગ્ય વિભાગને સામે આવી હતી. જેમાં આરોગ્ય વિભાગે કરેલી તપાસમાં અત્યાર સુધીમાં કુલ 74 બોગસ સમગ્ર રાજ્યમાંથી ઝડપાયા છે.

રાજ્યમાં કોરોના સંક્રમણનું એપ્રિલ મહિનામાં બેફામ રીતે વધારો થયો હતો, ત્યારે બિલાડીના ટોપની જેમ બોગસ ડોક્ટર પણ પોતાના નજીવા ફાયદા માટે લોકોના આરોગ્ય સાથે ચેડા કરી રહ્યા હોવાની વાત આરોગ્ય વિભાગ સામે આવી હતી. કોરોના કાળ દરમિયાન રાજ્યમાં કુલ 74 ડૉક્ટર કે જેઓ ડૉક્ટર જ ન હતા તેવા બોગસ ડૉક્ટર વિરુદ્ધ પોલીસે પણ કાર્યવાહી કરી છે.

આ ઉપરાંત પ્રતિબંધિત ડ્રગ્સનો ઉપયોગ કરતા હોય અને બોગસ ડિગ્રી ધરાવતા તબીબો સામે પણ કાર્યવાહી કરવામાં આવી છે. આમ 1 એપ્રીલથી 4 જૂન સુધીમાં ગુજરાત પોલીસે સમગ્ર રાજ્યમાં 74 બોગસ ડૉક્ટર સામે ફરિયાદ નોંધીને કાયદેસરની કાર્યવાહી હાથ ધરી છે.

બોગસ ડૉક્ટર બાબતે રાજ્યના આરોગ્ય પ્રધાન નીતીન પટેલે જણાવ્યું હતું કે, “ડૉક્ટરે જે પ્રકારની ડિગ્રી લીધી હોય તે જ રીતે દર્દીઓની સારવાર કરી શકે છે, પરંતુ અમુક બોગસ ડોક્ટર નજરે આવ્યા છે. તેમની સામે કડકમાં કડક કાર્યવાહી કરવાની સૂચના આરોગ્ય વિભાગના અધિકારીઓને આપવામાં આવી છે. આમ આવનારા દિવસોમાં પણ સમગ્ર રાજ્યમાં આરોગ્ય કર્મચારીઓને બોગસ ડૉક્ટર વિરુદ્ધ કાર્યવાહી કરવાની સૂચનાઓ આપવામાં આવી છે.”