ભારતે મહિલા T20 વર્લ્ડ કપની શાનદાર શરૂઆત કરી છે. બુધવારે ટીમ ઈન્ડિયાએ ટૂર્નામેન્ટમાં સતત બીજી ગ્રુપ મેચ જીતી હતી. કેપટાઉનમાં રમાયેલી મેચમાં ભારતીય ટીમે વેસ્ટ ઈન્ડિઝને 6 વિકેટે હરાવ્યું હતું. ટોસ જીતીને પ્રથમ બેટિંગ કરતા વેસ્ટ ઈન્ડિઝે 20 ઓવરમાં 6 વિકેટ ગુમાવીને 118 રન બનાવ્યા હતા. સ્ટેફની ટેલરે 40 બોલમાં 42 અને શેમેન કેમ્પબેલે 36 બોલમાં 30 રન બનાવ્યા હતા.

119 રનનો પીછો કરવા ઉતરેલી ભારતીય ટીમે એક તબક્કે 43 રનમાં ત્રણ વિકેટ ગુમાવી દીધી હતી. સ્મૃતિ મંધાના, શેફાલી વર્મા અને જેમિમા રોડ્રિગ્સ પેવેલિયન પરત ફર્યા હતા. આવી સ્થિતિમાં કેપ્ટન હરમનપ્રીત કૌર અને રિચા ઘોષે ભારતીય ઇનિંગ્સને સંભાળી હતી. બંનેએ ચોથી વિકેટ માટે 72 રનની ભાગીદારી કરી હતી. હરમનપ્રીત 42 બોલમાં 33 રન બનાવીને આઉટ થઈ ગઈ હતી. આ પછી રિચાએ દેવિકા વૈદ્ય સાથે મળીને ટીમ ઈન્ડિયાને જીત અપાવી. તેણે વિનિંગ શોટ (ચાર) માર્યો. રિચા 32 બોલમાં 5 ચોગ્ગાની મદદથી 44 રન બનાવીને અણનમ રહી હતી.

આ પહેલા દીપ્તિ શર્માએ ભારત માટે ઈતિહાસ રચ્યો હતો. તેણે આ મેચમાં ચાર ઓવરમાં 15 રન આપીને ત્રણ વિકેટ ઝડપી હતી. ત્રણ વિકેટ લીધા પછી, તે T20 માં ભારત માટે સૌથી વધુ વિકેટ લેનારી બોલર બની ગઈ. આ મામલામાં તેણે પૂનમ યાદવ (98 વિકેટ)ને પાછળ છોડી દીધી છે. આ સિવાય દીપ્તિએ T20 ઈન્ટરનેશનલમાં 100 વિકેટ પણ પૂરી કરી હતી.