સુરત: તહેવારો દરમ્યાન આગ લાગવાના 90 બનાવ,દિવાળીની રાત્રે જ ફાયર વિભાગને આગના 33 કોલ મળ્યા

દિવાળીના દિવસે આગના બનાવોમાં વધારો થતો હોય છે ત્યારે ગતરોજ દિવાળીના તહેવારને લઈને સુરત શહેરનું ફાયર વિભાગ આખી રાત દોડતું રહ્યું હતું. 90 જેટલા આગના બનાવો ફાયર વિભાગના ચોપડે નોંધાયા છે. એક નવેમ્બરની રાતની વાત કરવામાં આવે તો 12:00 વાગ્યા બાદ આગના 33 કોલ નોંધાયા છે.મોડી રાત્રે વરાછામાં આવેલી રચના સોસાયટી ખાતે આવેલા મોબાઈલના કવર ગોડાઉનની અંદર ફટાકડાના ઉડેલા તણખાને કારણે આગ લાગી હતી. આગ લાગતા અફરાતફરી મચી જવા પામી હતી. આગની જાણ થતાં જ ત્રણ જુદા જુદા ફાયર સ્ટેશનથી ફાયર બ્રિગેડના જવાનોનો કાફલો ઘટના સ્થળે પહોંચ્યો હતો અને ભારે જહેમત બાદ આગને કાબૂમાં લીધી હતી.આગને પગલે ગોડાઉનમાં રહેલો મોબાઈલ કવરનો જથ્થો તેમજ અન્ય સામાન બળી ગયો હતો. જોકે આ ઘટનામાં કોઈ જ પ્રકારની જાનહાનિ થઈ ન હતી.