એશિયન પેરા ગેમ્સ 2026ના પાંચમા દિવસે ભારતે શાનદાર પ્રદર્શન કર્યું હતું. નિતેશ કુમાર, નવીન શિવકુમાર અને હરવિંદર સિંહ-સંદીપ વિજયે ગોલ્ડ મેડલ જીત્યા હતા. જ્યારે સંદીપ કુમારે 400 મીટર T64માં વર્લ્ડ રેકોર્ડ બનાવ્યો હતો. ભારતે બેડમિન્ટન, તીરંદાજી અને એથ્લેટિક્સમાં અનેક મેડલ જીત્યા હતા જેનાથી તેની કુલ મેડલ સંખ્યા 100ને વટાવી ગઈ હતી.
ભારતીય ખેલાડીઓએ શુક્રવારે એશિયન પેરા ગેમ્સમાં શાનદાર પ્રદર્શન કર્યું હતું. બેડમિન્ટન, એથ્લેટિક્સ અને તીરંદાજીમાં ગોલ્ડ મેડલ જીત્યા હતા. નિતેશ કુમાર અને નવીન શિવકુમારે બેડમિન્ટનમાં ગોલ્ડ મેડલ જીત્યા, જ્યારે સંદીપે પુરુષોની 400 મીટર T64 દોડમાં વર્લ્ડ રેકોર્ડ સાથે ગોલ્ડ મેડલ જીત્યો હતો. હરવિંદર સિંહ અને વિજય સુંડીએ પેરા-રિકર્વ મેન્સ ડબલ્સ તીરંદાજીમાં ભારત માટે ગોલ્ડ મેડલ જીત્યો હતો. ભારતીય પેરા-એથ્લીટ હનીએ પુરુષોની ભાલા ફેંક F37/38 ઇવેન્ટમાં વર્લ્ડ રેકોર્ડ તોડ્યો, તેણે 60.49 મીટરના અંતર સુધી ભાલા ફેંકીને ગોલ્ડ મેડલ જીત્યો. આ જીત સાથે ખંડીય ઇવેન્ટમાં ભારતની મેડલ ટેલીમાં વધારો થયો છે.
ભારતના નિતેશ કુમારે પુરુષોની SL3 બેડમિન્ટન ફાઇનલમાં ગોલ્ડ મેડલ જીત્યો હતો, તેના દેશબંધુ પ્રમોદ ભગતને સીધી રમતોમાં હરાવ્યો હતો. બે ભારતીય પેરાલિમ્પિક ગોલ્ડ મેડલ વિજેતાઓ વચ્ચેની મેચમાં નિતેશ 21-18, 21-16થી જીત્યો હતો. પેરિસ પેરાલિમ્પિક ચેમ્પિયન નિતેશ માટે આ વિજય ખાસ હતો. તેણે ગયા એશિયન પેરાલિમ્પિક રમતોની નિરાશાને દૂર કરીને આ વખતે ટાઈટલ જીત્યું હતું.
નિતેશ કહ્યું હતું કે , “હું એશિયન પેરા ગેમ્સમાં ગોલ્ડ મેડલ જીતીને ખૂબ જ ખુશ છું. ગઈ વખતે હું નજીક હતો. ત્રીજી ગેમમાં 19-16 થી આગળ હોવા છતાં હું હારી ગયો. તેથી, આ વખતે જીતવું અને પ્રમોદ સામે બે ગેમ જીતવી ખૂબ જ ખાસ છે.” ભારતના નવીન શિવકુમારે પુરુષોની SL4 શ્રેણીમાં ગોલ્ડ મેડલ જીતીને બેડમિન્ટનમાં ભારતની સફળતા ચાલુ રાખી. આમ, ભારતીય ખેલાડીઓએ પુરુષોની બંને શ્રેણીમાં ગોલ્ડ મેડલ જીત્યા હતા.
