RCB vs SRH : કોહલીની સદીના દમ પર RCBએ હૈદરાબાદને હરાવ્યું, પ્લેઓફમાં સ્થાન મેળવવાથી એક જીત દૂર..!

IPL 2023ની 65મી મેચમાં રોયલ ચેલેન્જર્સ બેંગ્લોરે સનરાઈઝર્સ હૈદરાબાદને 8 વિકેટે હરાવ્યું હતું. પ્રથમ બેટિંગ કરતા હૈદરાબાદે 5 વિકેટે 186 રન બનાવ્યા હતા. જવાબમાં RCBએ 19.2 ઓવરમાં 2 વિકેટ ગુમાવીને 187 રન બનાવ્યા અને મેચ જીતી લીધી. અનુભવી બેટ્સમેન વિરાટ કોહલી RCB માટે તેના ફોર્મમાં પાછો ફર્યો, તેણે IPLમાં તેની છઠ્ઠી સદી ફટકારી. તેને ફાફ ડુપ્લેસિસનો સારો સાથ મળ્યો હતો અને બંનેએ પ્રથમ વિકેટ માટે 172 રનની ભાગીદારી કરી હતી.

આ બંને વચ્ચેની ભાગીદારીએ રોયલ ચેલેન્જર્સ બેંગ્લોરને સનરાઈઝર્સ હૈદરાબાદ સામે 8 વિકેટે એકતરફી જીત અપાવી હતી. આ સાથે, RCBની પ્લેઓફમાં જગ્યા બનાવવાની આશા હજુ જીવંત છે, જ્યારે હૈદરાબાદ પહેલેથી જ રેસમાંથી બહાર છે. RCBને પ્લેઓફમાં પહોંચવા માટે તેની છેલ્લી મેચ જીતવી પડશે અને રન રેટના મામલે મુંબઈથી આગળ રહેવું પડશે. બંને ટીમોએ એક-એક લીગ મેચ રમવાની છે. હાલમાં મુંબઈનો રન રેટ -0.128 છે અને RCBનો રન રેટ +0.180 છે.