• શહેર પોલીસ કમિશનરનો એક્શન પ્લાન

• ગુનાખોરી ડામવા માટે કમિશનરની પહેલ

• 12 વર્ષ પહેલાની યુક્તિ અપનાવતા કમિશનર

• હવે દર રવિવારે ગુનેગારોની થશે ઓળખ પરેડ

• પોલીસ કમિશનર જી એસ મલિકનો એક્શન પ્લાન 

અમદાવાદ શહેરના વસ્ત્રાલ વિસ્તારમાં અસામાજિક તત્વોના આતંકની બનેલી ઘટના બાદ સમગ્ર ગુજરાત પોલીસ એક્શન મોડમાં આવી છે,અને ગુનેગારો સામે કાર્યવાહી કરવામાં આવી રહી છે.ત્યારે શહેર પોલીસ કમિશનર દ્વારા આ ઘટનાની ગંભીરતા લઈને કડક કાર્યવાહી અત્યાર સુધીમાં કરવામાં આવી રહી છે, શહેરના 28 જેટલા પીઆઇની બદલી કર્યા બાદ હવે પોલીસ કમિશનર દ્વારા ગુનેગારોને ડામવા માટે 12 વર્ષ પહેલા તેઓના દ્વારા અપનાવવામાં આવેલી યુક્તિ ફરીવાર શરૂ કરવામાં આવી છે.

અમદાવાદ શહેર પોલીસ કમિશનર જી.એસ મલિક 12 વર્ષ પહેલા શહેર ક્રાઈમ બ્રાન્ચના જોઈન્ટ પોલીસ કમિશનર હતા, તે સમયે તેઓએ અમદાવાદ શહેરમાં અલગ અલગ ગુનાઓ આચરી ગુનેગારોને દર રવિવારે ક્રાઈમ બ્રાન્ચ ખાતે બોલાવી તેઓની ઓળખ પરેડ કરવાની કામગીરી હાથ ધરી હતી.જેના કારણે પોલીસને સતત જાણકારી રહેતી હતી કે કયો ગુનેગાર હાલ શું કરે છે અને તેણે ભૂતકાળના ગુના બાદ કોઈ નવો ગુનો આચર્યો છે કે કેમ. વધુમાં અમદાવાદ શહેર પોલીસ અને ગુનેગારો વચ્ચે બંધાતા સંબંધના કારણે ગુનાખોરી અટકાવવામાં તેમજ ગુના બનતા પહેલા તેને રોકવામાં પોલીસને સફળતા મળતી હતી. તેવામાં અમદાવાદ શહેર પોલીસ કમિશનરે તે જ જૂની પદ્ધતિ ફરીવાર શરૂ કરી છે. હવેથી અમદાવાદ શહેર ક્રાઈમ બ્રાન્ચ દર રવિવારે અમદાવાદના ગુનેગારોને ક્રાઈમ બ્રાન્ચ ખાતે બોલાવી તેઓની સાથે બેઠક યોજી જરૂરી સૂચના આપશે.

અમદાવાદ શહેર પોલીસ દ્વારા શહેરના 1481 જેટલા ગુનેગારોની યાદી તૈયાર કરવામાં આવી છે. જેમાં 303 જેટલા બુટલેગરો, 21 જુગારના અડ્ડા સાથે જોડાયેલા આરોપીઓ, 687 શરીર સંબંધી ગુનાઓ આચરનાર આરોપીઓ, મિલકત સંબંધી ગુના કરનાર 424 જેટલા ગુનેગારો અને NDPS તેમજ અન્ય ગુનાઓ કરનાર 46 આરોપીઓની યાદી તૈયાર કરી છે.અમદાવાદ શહેર પોલીસ કમિશનર જી.એસ મલિક દ્વારા ગુનેગારોને ક્રાઈમ બ્રાન્ચ ખાતે બોલાવવાની જૂની પદ્ધતિ ફરીવાર શરૂ કરવામાં આવી છે.

તેવામાં આ રવિવારે પહેલા દિવસે જ અમદાવાદ શહેરના 353 ગુનેગારોને ક્રાઈમ બ્રાન્ચ ખાતે બોલાવવામાં આવ્યા હતા.જે ગુનેગારોમાં ચેન સ્નેચિંગ કરનાર 60 આરોપીઓ, વાહન ચોરી કરનારા 139 આરોપીઓ, મોબાઈલ સ્નેચિંગ કરનાર 70 આરોપીઓ તેમજ શરીર સંબંધી ગુના આચરનાર 8 અને લૂંટ તેમજ ઘરફોડ ચોરી કરનાર 4 અને અન્ય ચોરી કરનાર 72 આરોપીઓને બોલાવવામાં આવ્યા હતા.પોલીસ કમિશનર જી.એસ મલિક દ્વારા તમામ ગુનેગારોને પોલીસની કડક ભાષામાં સૂચના આપવામાં આવી છે કે ગુનાખોરી તરફ વળશો નહીં નહિતર પોલીસ દ્વારા કડક પગલા લેવામાં આવશે. પોલીસ કમિશનરની સ્પષ્ટ સૂચના હતી કે ભૂતકાળમાં જે આરોપીઓ અલગ અલગ ગુના આચરી ચૂક્યા છે,તેઓ જો હવે કોઈપણ પ્રકારના ગુનામાં પકડાશે તો તેમની સામે વધુ કડક કાર્યવાહી કરવામાં આવશે.