અંકલેશ્વર : રાજપીપળા ચોકડી નજીકથી પોલીસે દારૂ ભરેલી ટ્રક ઝડપી, રૂ. 18 લાખથી વધુનો મુદ્દામાલ જપ્ત કરાયો

ભરૂચ એલસીબી પોલીસે અંકલેશ્વર નેશનલ હાઇવે પર રાજપીપળા ચોકડી નજીક આવેલ હોટલ સિલ્વર સેવનના પાર્કિંગમાંથી બિનવારસી દારૂ ભરેલ ટ્રક મળી રૂપિયા 18 લાખથી વધુનો મુદ્દામાલ ઝડપી પાડ્યો હતો.

મળતી માહિતી અનુસાર, અંકલેશ્વર નેશનલ હાઇવે પર રાજપીપળા ચોકડીથી ભરૂચ તરફ જતાં માર્ગ પર એસ્સાર પેટ્રોલ પંપની બાજુમાં આવેલ હોટલ સિલ્વર સેવનના પાર્કિંગમાં બિનવારસી ટ્રક નં. MH 18 M 8476માં વિદેશી દારૂનો વિપુલ પ્રમાણમાં જથ્થો સંતાડેલ હોવાની પોલીસને બાતમી મળેલ હતી, ત્યારે બાતમીના આધારે ભરૂચ એલસીબી પોલીસના સ્ટાફે દરોડા પાડ્યા હતા.

ભરૂચ એલસીબી પોલીસે ટ્રકના પાછળના ભાગે પ્લાસ્ટિકના કેરેટનું કવરીંગ કરી ટ્રકની બોડીની અંદર તલાસી લેતા તેમાંથી વિદેશી દારૂની 20,144 નંગ બોટલ મળી આવી હતી. જેમાં પોલીસે રૂપિયા 13.38 લાખનો વિદેશી દારૂ અને ટ્રક મળી કુલ રૂપિયા 18.49 લાખથી વધુનો મુદ્દામાલ જપ્ત કરી ટ્રક માલિક અને ચાલક વિરુધ્ધ પ્રોહિબિશન એક્ટ હેઠળ ગુન્હો નોંધી વધુ તપાસ હાથ ધરી છે.