ભરૂચ: ટ્રેનમાં વિદેશી દારૂની હેરાફેરી કરતો કુખ્યાત બુટલેગર જીતુ ખત્રી ઝડપાયો

સુરત રેલ્વે ક્રાઇમ બ્રાન્ચને બાતમી મળી હતી કે એક ઈસમ ટ્રેનમાં વિદેશી દારૂની હેરાફેરી કરી રહ્યો છે જેના આધારે ભરૂચના ધોળીકુઈ વિસ્તારના નામચીન બુટલેગર જીતુ ખત્રીને સુરત રેલવે લોકલ ક્રાઈમ બ્રાંચે ભરૂચ-અંકલેશ્વર રેલવે સ્ટેશન વચ્ચે ચાલુ ટ્રેનમાંથી ઝડપી પાડ્યો હતો. ગાજીપૂર એક્સપ્રેસ ટ્રેનમાં આરોપી ભારતીય બનાવટના વિદેશી દારૂનો જથ્થો લઈને ભરૂચ આવી રહ્યો હતો તે દરમિયાન પોલીસે દરોડા પાડી ૪૯ હજારના મુદ્દામાલ સાથે તેની ધરપકડ કરી છે.

આરોપી મુંબઈના બોરીવલી વિસ્તારમાથી વિદેશી દારૂ લઈને આવ્યો હોવાની માહિતી મળી રહી છે. અત્ર ઉલ્લેખનીય છે કે કોરોના મહામારી વચ્ચે મિનિ લોકડાઉનના સમયમાં માર્ગો પર પોલીસ ચેકિંગ વધુ હોવાના કારણે બુટલેગરો દારૂની હેરાફેરી માટે ટ્રેનનો સહારો લઈ રહ્યા છે.