ભરૂચ : સબજેલની પાછળની જમીનના વિવાદનું ભુત ફરી ધુણ્યું, જમીન સંપાદન સામે લોકોનો વિરોધ

ભરૂચની સબજેલની પાછળના ભાગે આવેલી જમીન પર જેલ વિભાગે કબજો જમાવવાનો પ્રયાસ કરતાં આસપાસ આવેલી સોસાયટીના રહીશોએ વિરોધ નોંધાવ્યો છે. જો આ જમીન ઉપર જેલ વિભાગનો કબજો આવી જશે તો સોસાયટીઓમાં જવાનો રસ્તો બંધ થઇ જશે તથા બાળકોનું મેદાન છીનવાય જશે તેવી ભિતિ સ્થાનિક રહીશોએ વ્યકત કરી છે...

ભરૂચના પશ્ચિમ વિસ્તારમાં આવેલ નુરાની સોસાયટી, સાબેના પાર્ક, બિજલી નગર અને હબીબ પાર્કના રહીશોએ કલેકટરને લેખિતમાં રજુઆત કરી છે. જેમાં જણાવ્યા અનુસાર ભરૂચના નગરયોજના-3 ના અંતિમ ખંડ 94-95ના પ્લોટ પર સૌ પ્રથમ પોલીસ વિભાગે 2013માં "માઉન્ટેડ અશ્વદળ પોલીસ પરેડ" મેદાન જાહેર કરી હતી. અને ત્યાં પોતાનું બોર્ડ લગાવી જમીન ઉપર કબજો મેળવવાનો પ્રયાસ કર્યો હતો. તે સમયે પાલિકાના આ વિસ્તારના ચુંટાયેલા પ્રતિનિધિઓ અને રહીશોએ વિરોધ ઉઠાવી મેદાનને પોલીસ વિભાગના કબજામાંથી મુક્ત કરાવ્યું હતું. અને બૌડાએ પોલીસ વિભાગને આ મેદાનનો ઉપયોગ કરવાની મનાઈ ફરમાવી હતી.

ત્યારબાદ માર્ચ 2020માં જેલ વિભાગે આ વિવાદીત જમીન ઉપર કબજો મેળવવા બોર્ડ લગાવ્યું હતું. જેની સામે વિરોધ ઉઠાવી કલેક્ટરને ફરીયાદ નોંધાવતા જેલ પ્રશાસન દ્વારા લગાવેલ આ બોર્ડ હટાવી લેવાયું હતું. ત્યાર બાદ આ ફરિયાદનાં અનુસંધાનમાં બૌડા દ્વારા જીલ્લા પોલીસ અધિક્ષકને લેખિત આદેશ આપી જણાવાયું હતું કે આ મેદાનની માલિકી બૌડાની છે. અને આ પ્લોટ ઉપર કોઈપણ પ્રકારનું બાંધકામ કરવું નહીં.તેમ છતાં પણ તાજેતરમાં પુનઃ જેલ પ્રશાસને વિવાદીત જમીન પર પોતાનો માલિકી હક્ક દર્શાવતું બોર્ડ લગાવી રસ્તો બંધ કરવાની કવાયત હાથ ધરતાં ફરી એક વખત મેદાનનો વિવાદ સપાટી પર આવ્યો છે.આ વિસ્તારના રહીશોએ ફરી એક વખત ન્યાય મેળવવા કલેક્ટર કચેરીના દરવાજા ખટખટાવ્યા છે. સોસાયટીના રહીશોએ નગર યોજના-3 ના અંતિમ ખંડ 94-95 ની જમીન ઉપર જેલ વિભાગે અનધિકૃત રીતે કબજો મેળવવાનો પ્રયાસ કર્યો હોવાની ફરિયાદ ઉઠાવી ન્યાયની માંગ ઉઠાવી છે.