ભારત હવે વિશ્વનું ચોથું સૌથી મોટું સ્ટોક માર્કેટ:હોંગકોંગને પાછળ છોડ્યું

ભારતીય શેરબજાર હવે વિશ્વનું ચોથું સૌથી મોટું શેરબજાર બની ગયું છે. ભારતે હોંગકોંગ શેરબજારને પાછળ છોડીને આ સ્થાન હાંસલ કર્યું છે.બ્લૂમબર્ગ દ્વારા જાહેર કરવામાં આવેલા ડેટા અનુસાર, હોંગકોંગ શેરબજારમાં સૂચિબદ્ધ શેરોનું કુલ મૂલ્ય 4.29 ટ્રિલિયન ડોલર છે, જ્યારે ભારતીય શેરબજારમાં સૂચિબદ્ધ શેરોની કુલ માર્કેટ કેપ 4.33 ટ્રિલિયન ડોલર સુધી પહોંચી ગઈ છે.અમેરિકા હાલમાં 50.86 ટ્રિલિયન ડોલરના માર્કેટ કેપ સાથે વિશ્વનું સૌથી મોટું બજાર છે. આ પછી ચીન 8.44 ટ્રિલિયન ડોલરની માર્કેટ કેપ સાથે બીજા સ્થાને છે અને જાપાન 6.36 ટ્રિલિયન ડોલર સાથે ત્રીજા સ્થાને છે. હોંગકોંગના હેંગસેંગના માર્કેટ કેપમાં સતત ચોથા વર્ષે ઘટાડો જોવા મળ્યો છે. તે જ સમયે, ચીનના શાંઘાઈ સ્ટોક એક્સચેન્જમાં સતત બીજા વર્ષે ઘટાડો જોવા મળ્યો હતો.બેઇજિંગના કડક કોવિડ-19 પ્રતિબંધો અને ભૌગોલિક-રાજકીય તણાવ સહિતના અન્ય કારણોને કારણે ચીનનું બજાર ઘટી રહ્યું છે. જ્યારે બીજી તરફ ભારતીય શેરબજાર સતત નવી ઊંચી સપાટી બનાવી રહ્યું છે.ચૂંટણી પૂર્વેના મજબૂત સેન્ટિમેન્ટ, મેક્રો ઇકોનોમિક સ્થિતિમાં સુધારો અને વ્યાજદરમાં કાપની અપેક્ષાઓને કારણે ભારતીય ઇક્વિટી માર્કેટ ઝડપથી વધી રહ્યું છે. આ સતત 8મું વર્ષ છે જ્યારે ભારતીય બજારમાં તેજી જોવા મળી રહી છે.