તુર્કી-સીરિયામાં 24 કલાકમાં ભૂકંપના 7 વિનાશક આંચકામાં 7,700થી વધુ લોકોના મોત થાય છે અને આ આંકડો વધી રહ્યો છે. બંને દેશોમાં ત્રીસ હજારથી વધુ લોકો ઘાયલ થયા છે. વર્લ્ડ હેલ્થ ઓર્ગેનાઈઝેશન (ડબ્લ્યુએચઓ) અનુસાર, તુર્કીમાં મૃત્યુઆંક આઠ ગણો વધી શકે છે.

તુર્કી-સીરિયામાં સોમવારે ચાર મોટા આંચકા આવ્યા બાદ મંગળવારે રિક્ટર સ્કેલ પર 5થી વધુની તીવ્રતાના ત્રણ ભૂકંપ આવ્યા. તુર્કીના રાષ્ટ્રપતિ રેસેપ તૈયપ અર્દુઆને જણાવ્યું કે આ દુર્ઘટનામાં 5,400થી વધુ લોકોએ જીવ ગુમાવ્યા છે. તેમણે 10 પ્રભાવિત રાજ્યોમાં ત્રણ મહિના માટે ઈમરજન્સી જાહેર કરી છે. 6 હજારથી વધુ ઈમારતો ધરાશાયી થઈ છે. માનવતાવાદી સહાય એજન્સી રેડ ક્રેસન્ટના જણાવ્યા અનુસાર, સીરિયામાં કાટમાળમાંથી 1,800 મૃતદેહો કાઢવામાં આવ્યા છે.

ઈટાલીના નેશનલ ઈન્સ્ટિટ્યૂટ ઓફ જીઓફિઝિક્સ એન્ડ વોલ્કેનોલોજીના પ્રમુખ કાર્લો ડોગલિયોનીએ જણાવ્યું કે ભૂકંપના કારણે તુર્કી 150 કિમીની ત્રિજ્યામાં ત્રણ મીટર ઉત્તર-પૂર્વ અને દક્ષિણ-પશ્ચિમ તરફ ખસી ગયું છે.

WHOના પ્રાદેશિક ઈમરજન્સી ઓફિસર કેથરિન સ્મોલવુડે કહ્યું કે, આવનારા 48 કલાક ખૂબ જ મહત્વપૂર્ણ છે. આ પછી કાટમાળમાં દટાયેલા લોકોના બચવાની શક્યતા ઘટી જશે.

તબાહી વચ્ચે તુર્કીમાં ફરી એકવાર ભૂકંપના આંચકા અનુભવાયા હતા. મંગળવારે સવારે આવેલા આંચકાની તીવ્રતા રિક્ટર સ્કેલ પર 5.5 માપવામાં આવી હતી. આ પછી બપોરે 5.4ની તીવ્રતાનો ભૂકંપ આવ્યો હતો. છેલ્લા 24 કલાકમાં આ પાંચમી વખત છે જ્યારે તુર્કીમાં ભૂકંપના આંચકા અનુભવાયા છે.

યુએસ જિયોલોજિકલ સર્વેની વેબસાઈટ અનુસાર, મંગળવારે પણ તુર્કીમાં ભૂકંપનો મોટો ઝટકો અનુભવાયો હતો. વેબસાઈટ અનુસાર, સવારે 9.45 કલાકે આંચકા નોંધાયા હતા, જેની તીવ્રતા રિક્ટર સ્કેલ પર 5.5 હતી. ભૂકંપમાં કુલ મૃત્યુઆંક 5000ને પાર કરી ગયો છે. તે જ સમયે, સીરિયામાં ભૂકંપના કારણે મચેલી તબાહીને કારણે અત્યાર સુધીમાં 1444 લોકોના મોતની પુષ્ટિ કરવામાં આવી છે. ભૂસ્તરશાસ્ત્રીઓનું કહેવું છે કે મોટા ભૂકંપના આંચકા બાદ પણ તુર્કી અને સીરિયાના સરહદી વિસ્તારમાં લગભગ 100 ભૂકંપના આંચકા અનુભવાયા હતા.