‘ધુરંધર’ના ડાયલોગ પર જૂનાગઢ બલોચ સમાજ રોષે ભરાયો, પ્રતિબંધની માગ

રણવીર સિંહ, સંજય દત્ત અને આર માધવન જેવી સ્ટારકાસ્ટ ધરાવતી ફિલ્મ ‘ધુરંધર’ બોક્સ ઑફિસ પર ધમાલ મચાવી રહી છે, પરંતુ સાથે જ તે ભારે વિવાદોમાં પણ સપડાઈ ગઈ છે.

ફિલ્મમાં સંજય દત્ત દ્વારા બોલાયેલા એક ડાયલોગને કારણે જૂનાગઢનો બલોચ મકરાણી સમાજ આક્રોશિત થયો છે. સમાજના મતે ફિલ્મમાં ઉપયોગમાં લેવાયેલા શબ્દો તેમની સામાજિક ભાવનાઓને ઠેસ પહોંચાડે છે અને તેમની સમૂહની છબીને નુકસાન પહોંચાડે છે. પરિણામે બલોચ સમાજે ફિલ્મ સામે કાયદેસર કાર્યવાહી અને રાજ્યમાં પ્રતિબંધની માંગ ઊભી કરી છે.

જૂનાગઢ બલોચ મકરાણી સમાજના પ્રમુખ અને વકીલ એજાજ મકરાણીએ તાલુકા પોલીસ સ્ટેશનમાં ફિલ્મના એક્ટરો, ડાયલોગ લેખકો અને ડાયરેક્ટરો વિરુદ્ધ અરજી કરી છે. તેમની ફરિયાદ અનુસાર ફિલ્મમાં સંજય દત્ત દ્વારા બોલાયેલા ડાયલોગ — *“મગરમચ્છ પે ભરોસા કર સકતે હૈ, મગર બલોચ પે નહીં”* — માત્ર અભદ્ર જ નથી, પરંતુ તે સમગ્ર બલોચ સમાજનું અપમાન કરે છે. બલોચ પ્રતિનિધિઓનું કહેવું છે કે આવા શબ્દો સમાજની છબી અંગે ગેરસમજ અને ઘૃણા પેદા કરે છે, તેથી તેને તરત દૂર કરવો કે ફિલ્મને પ્રતિબંધિત કરવી આવશ્યક છે.

આ મામલાએ ફિલ્મ ઉદ્યોગમાં પણ ચર્ચા જગાવી છે, કારણ કે ડિરેક્ટર આદિત્ય ધર, જ્યોતિ દેશપાંડે અને લોકેશ ધર દ્વારા બનાવવામાં આવેલી આ ફિલ્મમાં રણવીર સિંહ, અક્ષય ખન્ના, અર્જુન રામપાલ, સારા અર્જુન અને રાકેશ બેદી જેવા મોટા કલાકારોએ કામ કર્યું છે. સમાજની આ કાર્યવાહી બાદ ફિલ્મ ટીમની પ્રતિક્રિયા હજુ સુધી સામે આવી નથી. વિવાદ વધતા ફિલ્મના ભવિષ્ય અને તેની રિલીઝ પર કોઈ અસર પડશે કે નહીં તે અંગે ચર્ચા તેજ બની છે.