તેલુગુ અભિનેતા કૈકલા સત્યનારાયણનું 87વર્ષની વયે નિધન...
તેલુગુ ફિલ્મ ઉદ્યોગ જગતના પીઢ અભિનેતા કૈકલા સત્યનારાયણનું નિધન થયું છે. આ સમાચારે સમગ્ર તેલુગુ ઈન્ડસ્ટ્રીમાં શોકની લાગણી ફેલાઇ ગઈ છે.
તેલુગુ ફિલ્મ ઈન્ડસ્ટ્રીના ચાહકો માટે એક ખરાબ સમાચાર સામે આવ્યા છે. તેલુગુ સિનેમાના જાણીતા પીઢ અભિનેતા કૈકલા સત્યનારાયણ હવે આ દુનિયામાં નથી. અભિનેતા લાંબા સમયથી વય સંબંધિત બિમારીઓમાંથી પસાર થઈ રહ્યા હતા. પીઢ અભિનેતા કૈકલાએ 87 વર્ષની વયે અંતિમ શ્વાસ લીધા. કૈકલા સત્યનારાયણની લાંબા સમયથી હોસ્પિટલમાં સારવાર ચાલી રહી હતી. અભિનેતાનું આજે સવારે એટલે કે શુક્રવારે સવારે નિધન થયું છે.
કૈકલા સત્યનારાયણના પરિવાર પર આ સમયે દુ:ખનો પહાડ છવાઈ ગયો છે. કૈકલા તેલુગુ વિશ્વમાં એક મોટું નામ છે અને તેના ચાહકોની કોઈ કમી નથી. આ સમાચાર સામે આવ્યા બાદ ચાહકોમાં શોકનું મોજુ ફરી વળ્યું હતું. દરેક વ્યક્તિ સોશિયલ મીડિયા પર પોસ્ટ શેર કરીને કૈકલા સત્યનારાયણને શ્રદ્ધાંજલિ આપી રહ્યા છે અને તેમની આત્માની શાંતિ માટે પ્રાર્થના કરી રહ્યા છે. કૈકલાના અંગત જીવન વિશે વાત કરીએ તો, તેમણે 10 એપ્રિલ 1960 ના રોજ નાગેશ્વરમ્મા સાથે લગ્ન કર્યા.
પીઢ અભિનેતાને ચાર બાળકો છે, બે પુત્રો અને બે પુત્રીઓ. અભિનેતાએ તેની સમગ્ર ફિલ્મી કારકિર્દી દરમિયાન 750 ફિલ્મોમાં કામ કર્યું. કૈકલા સત્યનારાયણ દિગ્ગજ અભિનેતા એનટી રામારાવની ખૂબ નજીક હતા. અભિનયની સાથે કૈકલા રાજનીતિ સાથે પણ જોડાયેલા હતા. અભિનેતાએ ખૂબ જ નાની ઉંમરે તેની અભિનય યાત્રા શરૂ કરી હતી. અભિનેતાને સૌ પ્રથમ ડીએલ નારાયણ દ્વારા જોવામાં આવ્યો હતો. જે બાદ તેણે કૈકલાને 1959માં સિપાહી કુથુરુ ફિલ્મમાં રોલ ઓફર કર્યો હતો.
જોકે આ ફિલ્મ બોક્સ ઓફિસ પર કંઈ ખાસ કમાલ કરી શકી નથી. પરંતુ કૈકલા સત્યનારાયણના અભિનયથી સૌનું ધ્યાન તેમના તરફ ખેંચાયું હતું. અભિનેતાના અભિનયને જોયા પછી, કૈકલા સત્યનારાયણની તુલના એનટીઆર સાથે કરવામાં આવી હતી. કૈકલાએ તેની ફિલ્મોમાં તમામ પ્રકારના પાત્રો ભજવ્યા છે. અભિનેતાને વિલન તરીકે ખૂબ પસંદ કરવામાં આવ્યો હતો.
